eSefarad Noticias del Mundo Sefaradi
Komunidad Djudía de Torrelaguna, importante Aljama kon 9 Ravíes ke ansimezmo eran médikos, se topava al Norte de la Comunidad de Madrid.
Felisitamos a Radio Clásica en su 60 Aniversario, selevrado kon una Maratón Musical en el Centro Cultural Conde Duque kon aktuasiones de prestijiosos múzikos i entrevistas a presonalitades del universo muzikal kon los prezentadores de los programas. Ofresemos istoria i las investigasiones del Catedrático de Historia Medieval Enrique Cantera Montenegro, investigador afamado i eksperto en la istoria Medieval i en las Djuderías o Komunidades Djudías espanyolas, Catedrático de la UNED. Kompartimos testimonios de su Konferensia sovre la Djudería de Torrelaguna en Centro Sefarad-Israel. La Djudería de Torrelaguna era una de las más destakadas, era una Aljama kon su propias Takanot o Leyes i Bet Din (Trivunal Ravíniko). Malgrado ke esta Komunidad Djudía no konservó restos arkeolójikos, sí eksisten dokumentasiones de investigasiones sovre komo eran estas Aljamas. La istoria de la Aljama de Torrelaguna es de destakar, la povlasión djudía kontó kon un importante rolo ekonómiko, kultural i sosial. La Aljama kontava kon sus kumersios, komo una karnisería kosher (apta para el konsumo de los djudiós)Sinagoga i su semeterio, ma a partir de la «Ley de apartamiento de judíos y mudéjares de Castilla» aprovada en 1480 en las Cortes de Toledo, los djudiós devían morar en la djudería de modo uvligatorio. Dokumentasión istórika: En este programa ofresemos informasiones sovre kavsos de Prozesos inkisitoriales sovre algunos djudiós de Torrelaguna ke fueron akuvsados de modo falso, komo el kavso de Fernando de Madrid i algunos de eyios terminaron kemados en la oguera. A fines del S XV los djudiós en Torrelaguna eran en serka del karar de unas 200, 250 presonas, es dizir un 8 % de la povlasión. Kurunamos el programa kon la nana tradisional sefardí «Durme, durme mi andjeliko» en la interpretasión del Grupo A Ballare . «La istoria sale a la lus: Aljamas destakadas komo la de Torrelaguna ke se topava basho Djurisdiksión Senyorial, en Emisión Sefarad».
________________________________________________
Muevos orarios emisión: Domingos 09’30, Lunes 12’05, Lunes 22 hs. (Onda corta), España
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
