EL VIZIONARIO DE ROBOTES «ISAAC ASIMOV» trezladado por Simon Geron

Keridos amigos i amigas.

En el Daily Telegraph de oy avia un artikolo tratando de los robotes. Se mantiene ke al prinsipio eran programados para protejar a los seres umanos. Estamos al punto ande amanese la intelijensia artifisial. Ensenyaron a las komputadoras i a los robotes de djugar «Chess», eskrivir kansiones, konversar i performar unos echos domestikos. Pero va tomar muncho tiempo para ke los robotes puedan funsionar i pensar komo lo azen los seres umanos. De desidarmos a echarmos mismo afuera.

Saludes a todos.

EL VIZIONARIO DE ROBOTES «ISAAC ASIMOV»

70 anyos antes oy un autor vizionario publiko unas istorias kurtas ke tratavan de la istoria de los robotes, bazado sovre el punto de vista en 2057. Se avlava de la amenaza ke los robotes ivan apoderarse de la planeta i de lo ke se puedia azer para prevenirlo. El livro era influensado por «science fiction» i el autor era ‘Isaac Asimov» publikado en 2 Desembre 1950 por «Gnome Press». Susan Calvin’ ke era una Robopsikolojista ke metio las istorias endjuntos para krear un livro. No era la sola i munchos otros eskrivanos avian desvelopado los robotes durante su vida metiendolos en la TV i en los filmos. Asimov kreo el meoyo positroniko del robote fiksion ke se bazava sovre 3 leyes. Kon la idea de prevenir ke los robotes no agan mal a los seres umanos. Invito a munchos ke entren en este domenio para responder a las kestiones viniendo del livro sovre la intelijensia artifisial yevandolos al futuro.

Asimov, nasido «Isaac Yudovick Ozimov» en Petrovichi/Rusia el 2 Desembre 1920, sus parientes «Judah i Anna» eran fabrikantes de vistidos i la famiya imigro a Los Estados Unidos kuando era chiko. Se ambezo a meldar todo solo kuando tenia 5 anyos. Despues se fue al liseo terminando sus estudios kuando tenia 15 anyos. Despues entro en «Seth Low Junior College» ke era una rama de la Universidad de Columbia. Izo estudios de Siensia i Fizika ganando su bakaloreato en 1939. Djusto en el mismo tiempo publiko su istoria de science fiction «Marooned Off Vesta» tratando de astronotes perdidos en un vehikulo de espasio serka del Asteroide Vesta. Mismo si sus istorias mostravan un mundo teknolojiko muncho mas avansado, tenia unos elementos plausibles ke se bazavan sovre el konosimiento de Kimika i Fizika. Despues publiko en Junio 1939 su proxima istoria «Robbie» tratando de la relasion entre el Automaton i la ija ke lo tratava como un perro o gato. Este lavoro le izo ganar el «Premio de Hugo». En este tiempo la djente se interesava a los robotes. El termino era kreado por un eskrivano Chek «Karel Capek» por el djugo «R.U.R» Rossum’s Universal Robots» en 1920. Eran makinas sintetikas i biolojikas impersonando al ser umano.

En los anyos 1930 se avlava de la posibilidad de servirse de robotes en la Industria para los echos repetetivos. Pero los robotes industriales entraron en la eshena en los anyos 1960. Asimoz izo su Masters en 1941 durante la Segunda Gerra Mundial lavorando en la Marina komo un sivil, antes de ser kolokado por la Armada Amerikana en 1945. Servio asta 1946 i despues se torno a su Doktorato en la Universidad de Columbia para ensenyar. Publiko unos livros sovre los robotes explikando la relasion entre los seres umanos i sus kreasiones. En su livro «Roundabout» propzso ke 3 leyes sean programadas en los robotes.
1] De no hacer danyo al ser umano.
2] De obedeser los ordenes dados por el ser umano.
3] Ke el robote proteje su existensia.
Pero ay unos ke no kreen ke se puede programar a los robotes reales. Asimov eskrivio otros livros i se murio en 1992. Se dize ke un robot mato a su duenyo.

Trezladado por Shimon Geron, Sydney