eSefarad Noticias del Mundo Sefaradi
Keridos amigos i amigas
Fuimos komo Judios Turkanos tristes al oyir ke un teremoto grandissimo aharvo a 10 «ILCHES/sivdades en el sud este del pais serka de la frontera de Siria. Avian mismo unos Judios ke murieron en esta katastrofa. Kada dia oyiya las novedades en turko, fransez i espanyol eskuchando sus versiones. Me akodro kuando era chiko ke uvo un terremoto similar en Erzincan en 1939 aserkando de la Segunda Gerra Mundial.
saludes a todos.
EL TEREMOTO GRANDE DEL SIGLO
Kazas kayídas, kazas danyadas, kazas destruidas
Diezenas de miles muertos, enterrados debasho
Después de un grande terremoto de 7.7 grados
Aharvando a 10 sivdades al Sud Este de la Turkia.
Vinieron ekipos de ayudo de kaji todos los paises.
Kon sus traktores, vinches eskavando las piedras
Para salvar a los bivos enterrados debasho
En un klima muy frio serka del «Epi-Sentro» i Siria.
Miles se fuyeron de sus kazas sin nada, perdidos
Sin tener komida, abrigo, durmiendo en las kayes
Sin saver ande irse i si vendría el ayudo esperado
En una katastrofa la mas grande de Este Siglo
Mos amostraron en las emisiones lo ke se pasava
Kon una multitude de djente echando gritos i yorando
Lamentando a los ke konstruyeron sus apartamentos
I echando la kulpa al governo por no aver echo tanto.
Kayes enteras efasadas i tornadas a un terreno plato
Kontinuando por dias sin fin para topar a sus keridos
En el umo i la golor del pudrido sin perder la esperansa
Tornando montanyas de ruinas kon sus manos i perros
El presidente les prometio ke sus kazas serian konstruidas
I entretiempo los metieron en miles de magazenes i oteles
Les prepararon komida kayente i sienes de magazenes
Yevando a unos a otras sivdades en avión, tren i vapor
DIZIENDO ALLAHU EKBER
Tradusido por Shimon Geron
Sydney 14/2/2023
Fuente: Ladinokomunita
