El Sr. David Ben Gurion regreto ke no ambezo el Ladino por Sara Sufrin Baruch

En el anyo 1912 el Sr. David Ben-Gurion, el ke fue uno de los fondadores del estado de Israel i su primer ministro, arrivo a Salonik-Gresia, ke estava entonses basho del dominio Otomano, para aprender la lingua Turka, kon el buto a ser akseptado a la Universidad komo estudiante de Derecho. La razon ke prefero la sivdad  Salonik fue por ke savia ke era una sivdad djudia.

En su letra, al Sr. Recanati, editor del livro «Ziheron Saloniki» (Memoria de Saloniki) en el anyo 1970 , el Sr. Ben-Gurion deskrivio sus rekuerdos i impresiones, sovre la sivdad, donde moro un poko mas de un anyo.

Kuando yego a Salonik, se enkontro kon una sivdad djudia ke no era komo ninguna otra en el mundo entero, ni en Israel. Su dezeo era ke un dia si se va avrir gerra, Salonik va ser un estado independiente  kon abitantes djudios.

Todos los lavoros en esta sivdad – en las fabrikas, en el komersio i en el porto, fue echo por manos de ovreros djudios  , los barkos no podian deskargar su kargo o salir a la mar en Shabat, porke los ovreros djudios no lavoravan.

En Salonik moro Ben Gurion en la kaza de una famiya djudia ke su patrona, una mujer ayedad, lo trato komo ser su fijo, ma eya no podia entender por ke el no save avlar Djudeo Espanyol, la lingua avlada por los dJudios de la sivdad.  Djente  ke konosia en la sivdad, lo akavidaron no kontar ke es de  orijin «Ashkenazi «,  ke no era konsiderado positivo.

Desde ke ayego a la sivdad para ambezarse la lingua Turka, enkontro un maestro djudio, un estudiante de la Universidad de Salonik, yamado Strumsa, ke savia un poko de Ebreo, i le oferio su ayudo. Siendo ke la lingua Turka no fue fasil, desidio a dedikar todo su tiempo estudiarla i no aprovo a ambezarse  el Ladino

Durante su estada en Salonik  el Sr. David Ben Gurion fue okupado tambien  en  aktividad Sionista, kreo  kontakto kon los ovreros djudios de la sivdad, konvoko reunionas i dyo konferensias sovre el Sosializmo Djudio.

En la gerra de los Balkanes, ke se desbrocho en 1913, la sivdad fue konkuistada por los Gregos, el Sr. Ben Gurion se avia ovligado a pasarse a Estambul, donde estudio Derecho en la Universidad, despues ke termino la segunda klasa  en el anyo 1914, kavzo  la Primera Gerra Mondial el fue expulsado de la Turkia i torno a  Eretz Israel.

El Sr. David Ben Gurion regreto siempre, ke durante su estada en Salonik, no ambezo el Ladino, porke akel tiempo, la mayoridad de los abitantes djudios ke bivian en Yerushalayim, eran Sefaradim i avlavan Ladino.

Mas de todo lo ke le vino pena, era por la sivdad Salonik,  ke era la sivdad mas djudía en el mundo entero, i fue konvertida en una sivdad grega i durante la Segunda Gerra Mundial, kaji todos su abitantes dJudios, fueron exterminados por los nazistas.

Eskrito por: Sara Sufrin Baruch
De Israel
Mayo  2013.

Fuente: El livro «Ziheron Saloniki» (Memoria de Salonik) «La grandeza i la destruksion de «Yerushalayim de Balkan» . Editor: David Recanati.