eSefarad Noticias del Mundo Sefaradi
Keridos amigos i amigas
En el Jewish News de esta semana tenemos un artikolo sovre los diez dias de penitensia ke vienen kon los Dias Santos entre Rosh aShana i Yom Kippur. Segun la tradision el mes de ELUL empesa esta semana i entramos en la temporada de los Dias Santos. Este artikolo fue prezentado por Yossi Aron.
Saludes a todos
——————————————————————————-
EL SHOFAR SE OYE A TRAVES LA TIERRA
TEKI’A, SHEVARIM, TERUA, TEKI’A.
Es ke vino el tiempo?
Los Kabbalistas metieron en la lista el konsepto de Yom Kippur Katan un dia mas chiko para arrepentirse en la noche del Rosh Hodesh en los meses del anyo.El Ta’anit se observa por poka djente. Oy se konose komo una okazion para meldar las Selihot en tiempo de Minha.Mismo en las komunidades de antes no se observava tanto. Komo este anyo Rosh Hodesh Elul kaye en Viernes,se va observar un dia antes en djueves para ke esto no toke al Shabat. En «El mundo viejo» dezían ke al oyir el shofar en ELUL,mizmo los pasharos i los arvoles tenian espanto de ser djuzgados.»Ashre adam mefahed tamid» (Mishle 28, 14): «Bienaventurado el ombre ke se espavorese de kontino». Esto fue dicho por el Rey Shelomo ke era el ombre el mas intelijente en el mundo.En el Mundo de MUSAR,antes de la gerra en la Evropa del este,ELUL tenia signifikasion grande.
En todas las sinagogas aki,la semana ke viene van a tener orasiones suplementarias diarias.Los Ashkenazim resitaran dos vezes al dia el psalmo: «Adonay Orí Ve Yishi» / «Adonay es mi luz i salvasion» (Tehilim 27). Los Sefaradim resitaran las Selihot.»De los 40 dias desde Rosh Hodesh ELUL reprezenta lo ke mos konta la Tora: Moshe estava en la montania de Sinay 40 dias.Se termino kon su abashada en Yom Kippur kon las dos tavlas de la Ley ke simbolizavan ke la Nasion Judia era perdonada.Desde ke nasio la Nasion Judia, en Yom Kippur la nasion aksepta todo lo ke reprezenta la Tora.Mismo si las tavlas de la Ley antes fueron rechasadas i rompidas.El Kabbalista grande Yitzhak Luria komparo al mes de ELUL a una sivdad de refujio ande uno si mizmo avia matado,puedia ser perdonado.Se melda: «a Elohim Ina Le-yado» (Shemot 23,13) «el Dio lo entrego en su mano»; kijo dezir «lo izo por aksidente ke kometio el pekado i se fue a un lugar para fuirse».Un otro verso es «Ani Le’Dodi Ve’Dodi Li/
«So para mi amante i mi amante es para mi».
Aki se refera a la relasion entre el ombre i el Dio. Un otro verso «Et Levaveha ve et Levav zareha» (Devarim 30, 6)/
«Tu korason i el korason de tus desendientes».
Aki se trata de Teshuva/Arrepentimiento».
En la Megila de Ester se topan en las Mitsvot de Purim una porsion de komida «Mishloah Manot Ish Lere’eu uMatanot La Evyonim/Enbiyar prezentes kada uno a su kompaniero i regalos para los proves». Esto es Tsedaka mizmo si se melda MUSAF en los dias santos ay ke arrepentirse,rogar al Dio i azer karidad para se troke el kastigo.Teshuva simboliza ser mas rafinado. Tefila simboliza enforteser la relasion entre el ombre i Dio.Tsedaka simboliza el dover entre el ombre i su kompaniero. En ELUL se aze los tres.
KETIVA veHATIMA TOVA A TODOS.
Trezladado por Shimon Geron.
Australia
Fuente: Ladinokomunita
