EL SHOFAR ESKONDIDO EN EL KOTEL

Keridos amigos i amigas.
El Sefaradi Bulletin tenia un artikulo hablando de las kondisiones en tiempo de los Britannikos en Palestina. Las historia del Rabbino «Moshe  Segal» la topi muy interesante.I este kuento salio de su diario.
Saludes a todos.

EL SHOFAR ESKONDIDO EN EL KOTEL

El Beit Ha Mikdash en jerusalem fue destruido 2 vezes.Una vez por los de Babylonia i despues por los Romanos.Hay una pared ayi ke se kedo del Templo i es el simbolo ke la Tierra Santa kon Jerusalem apartienen a los Judios.A esta pared la yaman»Ha Kotel Ha Maaravi». Signifikando, la pared kaiendo al Oestre.Aki tenemos una historia del Rabbino»Moshe Segal» [1904-1985].Este hombre era uno ke lucho para liberar la Tierra Santa de los Britannikos.
Un tiempo la parte delantre del Kotel no era komo es hoy.Era una kaie estrecha separando el Kotel de las kasas de los Arabos en frente.El Gobierno Britanniko no permetia ke metan ayi el Arko,mesas i siyas.No era permetido de haser orasiones en boz alta. Todo esto para no inkomodar a los Arabos. Era defendido de meldar la Torah i chuflar el shofar en Rosh Hashana i Yom Kippur.Los Britannikos metian ayi sus gurdias Obligaban a la gente de irsen a una sinagoga en el Barrio Judio de la Sivdad Antigua. Los Britannikos metian ayi la polisia en kada lado del Kotel.

Un dia de Yom Kippur en 1930 kuando estaban hasiende sus orasiones en el Kotel, entre el Musaf i la Mincha, Moshe oio la gente hablando entre eyos i disendo» Ande nos vamos a ir para oir el shofar? Esto no se puede haser aki kon la polisia» Mismo el Kommandante estaba ayi.Oiendo estas palabras Moshe se disho «Es ke se puede annular el Shofar? El shofar es una manera de reklamar la soberania del Dio.Chuflar el Shofar no era mas ke un kostumbre Judio.» Moshe se fue a ver el Rabbino»Itshak Horenstein» ke era el Rabbino de su komunidad. Despues le disho»Dame el Shofar» «Porke?» «Yo voy a chuflarlo».Komo ninguno estaba muy seguro,Moshe se dirijio al pulpito,pensando ke seria el solo lugar para eskonder el shofar.Al ver ke estaba ayi,lo tomo i se lo metio debasho de su kamisa. Moshe no era kasado i komo un Ashkenazi,no tenia ke meterse en Tallit. Ma el kijo haserlo i se torno a un Sefaradi i le demando ke le de su Tallit. En metiendo este Tallit,Moshe habia kreado su domenio privado en este dia el mas santo. Los Judios no tenian la libertad de servir al Dio. Ma debasho el Tallit se sentia libre a servir al Dio.Todo alrededor de el era extranjero,reinando sobre los Judios mismo en un dia santo. Debasho del Tallit tenia ke haber un otro domenio i era el domenio del Santo Bendicho.Moshe haria todo lo ke el Dio le kommendaba de haser.

Kuando vino el tiempo de»Ne’Illah»[Shema Israel] tomo el shofar i hizo un chufle alto i largo ke se oia de todos los lados. Subito todo se paso de una manera rapida, i se topo serrado por munchas manos. Se kito el Tallit i delantre de el estaba el Kommandante Britanniko de la polisia.Moshe fue arrestado. Lo yevaron a «Kishleh»u na prision en la Sivdad Antigua i metieron ayi a una guardia Araba. No le daron a komer ni a beber para romper el tanid.A media noche de manera inesperada vino el orden ke lo deshen partir.

Saliendo afuera se topo kon un grupo de mansevos de» Yeshivat Merkaz Ha Rav» fondada por el Rav Kook.Les demando «Ke estash hasiendo aki en media noche?» Eyos le disheron ke al ver lo ke se paso, unos estudiantes se fueron a ver al Rabbino»Abraham,Yitshak Kook». El Rabbino estaba kontento ke uno tuvo el koraje de chuflar el shofar en este dia santo,en el Kotel. Ma se sentio triste kuando arrestaron a Moshe. Todo esto se pasaba antes ke el Rabbino Kook habia rompido su tanid. El no komio hasta ke yamo al Sekretario de las Kommissiones Altas en Palestina.Demando ke deshen partir a Moshe.Kuando refusaron el disho ke no iva romper el tanid antes ke liberen a Moshe. El Sekretario resistio por horas,ma komo tenia respekto por el Rabbino,no tuvo otra solusion de desharlo partir a Moshe.

En los proximos 18 anios, hasta ke la Sivdad Antigua kaio en manos de los Arabos,el shofar sonaba kada Yom Kippur.Los Britannikos sabian ke signifikasion tenia esto. Ademas lo sabian ke un dia ivan a partir de aki. Justo komo kaieron las paredes de Jericho.

El Rabbino Moshe Segal era uno de los primeros ke se fue a bivir en la sivdad vieja,kuando Jerusalem fue liberado en 1967. Ahora kada anio puede chuflar el shofar sin tener espanto hasta el dia de su muerte.

Tradusido por Shimon Geron
para Ladinokomunita