eSefarad Noticias del Mundo Sefaradi
En Haifa, serka del porto, moravan dos famiyas judiyas, vizinas.
Una famiya era israelyana de generasiones, i la otra era famiya ke suvieron a israel de Lebanon. Las dos famiyas teniyan relasiones buenas, i los ijikos de diez anyos de las doz famiyas eran amigos de alma i korason. Moris era de la famiya lebaneza, i Moni era de la famiya israeliana. Los doz ambezaron en la mizma eskola, i faziyan los doveres, o ande moris o ande Moni. En esta manera se ambezo Moni avlar arabo, i Moris embezo el ebreo. Los doz se engrandesieron kon las doz linguas.
Pasaron anyos, eskaparon los estudios, i eran prontos de empesar el servisio militario. Moris paso su servisio a la fuersa de la intelijensia (kon la saviduria del arabo) i detras del servisio militario, se fizo el direktor de una eskola grande en Haifa.
Moni estuvo en la fuersa aerea (aviasion), era oficier i pilot de batai. Una noche estuvo Moni en un bolo de atakar, en los sielos de Lebanon, i se kunsentio ke ay danyo en el avion, o ke lo tiraron o ke ay problema en el motor. Las luses koreladas de emergensia se alumbraron, i rapidamente entindio ke deve abandonar el avion.
Apreto el buton de salvasion, i ya estuvo abashando kon el parashut a la tirra libaneza en el sud del paez. En arivando a la tierra, arekojo el parashut i lo eskundio bueno en un burako, i lo tapo kon alas de arvolikos. Penso de aserkarse a la frontiera kon israel, ama entendio asigun las luses meneandosen, ke el enemigo lo esta bushkando.
Troko el plan, i empeso a kaminar i korrer verso el norte de Lebanon. El diya se eskundio, i la noche kuntineo, beviendo agua de los podjos ke topo, aranko frutas de los arvoles, i se adelanto verso el norte del paez. Una noche vido una kaza de kazalinos, kon kurtijo, i kon kolada enkolgada, se aserko ala noche, i tomo vistimienta de kazalino, un par de chizmeses i una chapa(hoe ing) , en este modo empeso a kaminar i en los diyas , komo un kazalino lokal, ke esta indo a kultivar su kampo de agrikultura. en vezes se suvio a las arabas kon kavayos ke pasavan, i se adelanto mas presto en su kamino, la lingua araba kon el dialekto libanezo ke savia , le ayudo.
Pasaron diyas, i Moni entro al sud de Beirut. Demando onde se topan las ambasadas ajenas, i las topo. Asegun la bandiera amerikana, topo la ambasada amerikana, i le disho al bekledji ke kiere avlar kon uno de los empiegados. el bekledji telefoneo, i en dos puntos Moni se entro ala ambasada amerikana, kanso, palido, i ambierto, ama orozo, ke ya se salvo, ke ya esta en manos amikales.
Paso una semana, i Moni ya estava en manos de su famiya. Al pranso ke le fizieron, konto Moni lo ke paso, i komo se salvo kon el ayudo de la savidura de la lingua araba ke la tiene de su chikes.
Les disho a todos: koza ke se ambeza en la chikes, es komo gravado en la piedra, siempre esta en la kavesa.
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
