eSefarad Noticias del Mundo Sefaradi
Keridos amigos i amigas.
En el Daily Telegraph del 14 de djunio se avla del Capitan Cook, el ombre ke deskuvrió la Australia i otros paises kayendo basho el dominio de Ingletierra. En segida de esto la Australia se avia echo una Kolonia Penal ke kon el tiempo resivio otros imigrantes i se izo independiente en el reinado de la Commonwealth.
Saludes a todos
——————————————————————————-
COOK KAJI PERDIO SU LUGAR EN LA ISTORIA
Por unos kuantos dias el «Endeavour» estava serka de un dezastre. En 24 Mayo 1770 el Luteniente «James Cook» en komando se kedo en medio de la mar por una noche al ver alderedor los korales i yamo a este lugar «Cape Capricorn», ke oy se topa en Queensland. Partiendo el proximo dia los obstákolos se izieron mas grandes. En 27 Mayo viajando a traves el grupo de islas, las llamo «Keppel» i el fondo de la mar no era bastante profundo. Tuvieron de embiar barkas para topar un kanal para navigar. El vapor tomo el kamino al norte, pero el pasaje entre la kosta i los korales se izo mas estrecho. Los marineros estavan mezurando la profundidad en echando un pezgo abasho i el vapor avanso para asegurarse ke el kamino estava klaro. En 3 Junio yegaron a «Whitsunday Passage» i en 10 Junio el vapor se kedo en «Mission Beach». Partio de muevo en 11 Junio 1770 antes 250 anyos oy. Era una noche klara kon la luna, pensando ke seria seguro, pero en supito el pasaje se izo mas estrecho. Cook estava dando los ordenes de kedarse ayi i el personel le disho ke estavan de muevo en aguas profundas. Unos minutos antes de 11.00 el ombre en la kavesa vido ke el vapor no avansava.
Unas semanas antes el ekipaje al bodre del Endeavour avia echo istoria en abashando a «Botany Bay/Sydney» siendo los primeros Evropeos de meter los pies al Este de la Australia. Esto fue kaji perdido al mundo por razon de los korales ke Cook les dio el nombre «Great Barrier Reef». Se aharvaron ayi kon tanto fuersa ke munchos kayeron en la mar. Despues de rekuperarsen del shok, tomaron el vapor en mano para ke no se meneye. Kitaron mismo el pezgo para ke el vapor sea mas liviano. Esto venia a 10 tonos de fierro. No era bastante i tuvieron de echar mas echando afuera los kanones i todo lo ke se puedia echar. El botanisto del vapor «Joseph Banks» estava sorprendido de ver el ambiente frio en frente del peligro. Una vez ke suvieron las olas el vapor se fue verso las rokas. El resultado fue ke avia agua ke entrava en el vapor. Al no poder liberar el vapor de las rokas, tuvieron ke tener un otro plano i travar el vapor afuera de los korales. Las pompas no kaminaron bueno kon las aguas entrando en el vapor. Endeavour por finir se fue verso la kosta por reparasiones. En 17 Junio el vapor se fue a la boka ke se yamo «Endeavour River». Se kedaron ayi por unas semanas, biviendo de animales salvajes dela shara i del oséano. El primer plato fue tortugas. Enkontraron a unos kangarus i tentaron de komunicar kon los indijenos serka del kampo. En 18 Junio las reparasiones estavan kompletas. Cook, Banks i el Naturalisto Sueduazo «Daniel Solander» traversaron el rio para explorar la rejion a 13 kilometros norte de ayi.
Se enkontraron kon mas nativos i kaminaron en la kosta. Cook vido ke la vista de la mar no lo asegurava. No fue asta 4 Augusto ke finalmente partio el vapor. Tomo el kamino peligrozo i en 16 Augusto estava serka de ser arrastado por un viento fuerte serka de los korales. Despues vino un otro viento yevando al vapor en otra direksión a las aguas seguras. Uno se demanda ke serian las konsekuencias si el vapor kon todo el ekipaje avian desaparesido? Se ivan a dizirse ke Cook, su ekipaje i el vapor se avian perdido. Australia oy seria un otro pais.
Trezladado por Simon Geron
Fuente: Ladinokomunita
