EL İJO DEL NAZİ por Dora NİYEGO

Kuando Bernd Wollschlageger teniya katorze anyos en los setentas, se ambezo ke su padre ke era un ereo en la Segunda Gerra Mondial, era en realidad un Nazi, en el tiempo del Olokosto.

Nazi Wollschlageger nunka tuvo remorso por el Olokosto, ni por sus aksiones en la armada de Hitler.

Kuando padre i ijo estavan endjuntos, el Nazi le kontava, kon argolyo, komo resivio de la mano de Hitler, La Kruza de Kavalyero (ke es el mas alto premio de los Nazis), por su koraje i reushita, komo komandante de los Nazis.

Akeyos diyas, la estorya de La Segunda Gerra Mondial, a Bernd, le viniya muy ermoza. Ma, mas duspues, Bernd empeso a ambezarse de una de sus vizinas, la realidad sovre la gerra. El marido de la vizina, Kolonel Claus Von Stauffenberg, fue asasinado por su partisipasion en un komplo aparejado por asasinar Hitler.

Duspues del masakro de los atletes israelianos en los djugos olimpikos de Munih 1972, en la eskola, empesaron a avlar del Olokosto. Bernd empeso a demandar kestiones a su padre, sovre el Olokosto. El Nazi inyego la verdad, i disho ke estas son mintiras ke los profesores komunitos estan envantando. Ma, a la fin, el Nazi fue ovligado a konfesar la verdad, i akuzo los SS ofisies por lo ke afito. Akel diya, Bernd se dezyelo de su padre, i se alesho de el.

Kuando Bernd vino a diziocho anyos, se konosyo kon un grupo de mansevos israelianos i arabos, i empeso a viyajar kon eyos. En el grupo, tuvo una amiga israeliana, ke mas duspues lo yevo a Hayfa, i lo prezento a su padre, ke era un sorvivente del Olokosto. Kuando Bernd vido el numero tatuado en el braso del sorvivente, kijo vijitar Yad Vashem, i ambezarse todo lo ke afito en el Olokosto. ‘Es la primera vez ke entendi lo ke en realidad sinyifika los ‘sesh miliones’, ke todos avlavan’ disho Bernd. ‘Akel diya, me desidi de konoser de serka los judyos, i entender el esprito, i el koraje ke los permetio de kontinuar a bivir duspues del Olokosto, de fondar muevas famiyas, i de establisir un muevo estado’.

Kuando Bernd torno a la Almanya, por eskapar sus estudios de medisina, se prezanto a una komunidad de los sorviventes, i los konvensyo para azerse sus ‘Shabbas Goy’. El Nazi Wollschlageger ke oyo esto, lo echo de kaza, ma la komunidad de los sorviventes no lo desharon solo, i kontinuaron a finansarlo, fin ke eskapo sus estudios. ‘Sovre este komporto de los judios, me desidi de azerme judyo’ disho Bernd.

En el anyo 1986, kuando eskapo sus estudios, el Beit Din de la Almanya, lo konvertyo al judaizmo, i en el anyo 1987, Bernd izo aliya.

Duspues ke se ambezo ebreo, Bernd se enskrivio a las Fuersas de Defensia de İsrael. ‘Todo tuve el espanto ke se ivan a ambezar ke so ijo de un Nazi. Este sekreto lo guadri de todos, mezmo de mi mujer’ disho Bernd.

Kuando el ijo de Bernd vino a katorze anyos, le empeso a demandarle kestiones sovre su nono. Akeyos anyos, Bernd estava biviendo en los Estados Unidos, kon su famiya. Penso ke mas no iva pueder guadrar su sekreto, i se desido de kontar su pasado a su famiya.

Un diya, los diridjentes de la eskola de su ijo, lo yamaron a la eskola, i le demandaron si es verdad lo ke su ijo les konto. Bernd konfeso la verdad. Los diridjentes le konsejaron de no guadrar mas su pasado, i de kontarlo a todos, por kurarse. Duspues de akel diya, Bernd kontinuo a kontar su pasado en todas las konferensias ke dio.

Bernd pago un presio grande por esto, porke su mujer lo desho, i el sufriyo muncho toda su vida, ma a la fin entendyo ke kale ke salga afuera de su solombra areskuro, i ke se ambeze de los yerros de su padre. ‘A la fin, ize pas kon mi pasado, i entendi ke yo no so responsavle de los pekados de mi padre’ disho Bernd en una de sus konferensias.

Dora NİYEGO

Fuente: BÜLTEN de los Turkanos de Israel – turkisrael.org.il

Check Also

Raíces de Sefarad/Online: LAS CASAS QUE SE REPITEN. Conversación con DENISE LEÓN con la participación de TAMARA MIKUS – Jueves 11 SEPTIEMBRE 2025, 18 hs (Argentina)

  – – – – – – – – – – – – – RAÍCES …

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.