Keridos amigos i amigas
En el Jewish News de esta semana avia un artikolo sovre el filmo «The favourite» ke trata de los djugos de amor en la korte real de Ingletierra. Era una komedia i una drama indo atras al tiempo del Reynado de Anne (1702-1714). El direktor era Grego i se yamava «Yorgos Lanthimos», ke reusho a krear un mundo de intriga, manipulasion i amores ande se enganyan i ay muncho sekso. La artista Rachel Weisz la vide en munchos filmos. En un filmo djugo en el rol de una ija del Rabino en Melbourne ke viene de murir i se torna atras para los funerales. No tiene su lugar en la Komunidad Ortodoksa. Penso ke es una Judia Hungara ke bivio en la Australia i puede ser ke oy bive en Ingletierra o Amerika. En munchos filmos se mostra desnuda i se topa en istorias de amor.
Saludes a todos
——————————————————————————-
DJUGOS DE AMOR EN LA KORTE REAL DE INGLETIERRA
La Reyna Anne reyno en un tiempo de truble i de un kambio politiko. Tenia rivalidades entre los «Whigs i los Tories. Avia gerras entre Fransia i Espanya. Todo empesó despues de la muerte del marido de Anne, Princhipe de Danimarka en 1708. Anne tenia un temperamento malo por razones de su salud mala. El filmo mostra las libertades poétikas i las relasiones intimas entre Anne i Sarah Churchill/Duchessa de Marlborough. El rol se djugo por la artista Judia «Rachel Weisz» ke se izo la konsejera de la reyna. Entre eyas se yaman «Mrs Morley i Mrs Freeman». La prima Sarah es «Abigail Hill» ke se mete en kompetisión i djuga el rol de una poderosa. Sin la performansia de Weisz i Stone, el filmo puedia terminar kon la Istoria de la Monarkia Britanika. Los del palasio no ven lo ke se pasa afuera. Estas 3 mujeres gozan de lo mas del poder i los ombres orren detras de eyas. Ingletierra esta en gerra i la Reyna Anne no se lo olvida. El parlamento i la Armada bushkan tener su apoyo finansiero. La moneda falta. No tiene una estratejia de gerra. En todo esto se siente muy perdida.
Trezladado por Shimon Geron.
Sydney, Australia
Fuente: Ladinokomunita
eSefarad Noticias del Mundo Sefaradi
