eSefarad Noticias del Mundo Sefaradi
Keridos amigos, aki un resumen i fotos de un dia inolvidable ke tuvo lugar en el salon de Fiestas de muestra sinagoga Beth El.
Vinieron mas de cien personas directores i representantes de varias instituisiones de Rio de Janeiro – Brasil, la presensia de la Sra. Ruth Cohen , vice-presidente de la Wizo Rio, Sr.Aron Cohen membro del «Conselho Sefaradi», Sra. Eva Solevicz diretora de Cultura da Wizo Rio e Wizo Brasil , i el journalista Sr. Jacob Zajdhaft ke mos izo una kronika en su newsletter.
Avri la tadre avlandoles komo se dishido por el dia Internasional del Ladino/djudeo-espanyol, el motivo de este dia, i komo se fiestava en el mundo entero, ya ke el noventa por ciento eran askenazim, les avli de muestro grupo LADINOKOMUNITA el origen de las participntes i les avli de muestro viajes a kada anyo.
Despues pasimos el video ke Rachel Amado Bortnick, la kriadora de Ladinokomunita, mos mando, un ermozo video i unas dulses palavras, ke nos emosionaron,
Despues la Sra. Eva Solevicz avlo i alavo muestro grupo «Kaminando i Avlando» de la Wizo, i mos felicito por la perseverancia de resguadrar muestro idioma.
La Professora Cecilia Fonseca da Silva, linguista i amante del djudeo-espanhol mos dio explikasiones sovre esta lingua i sus kansiones, estava tan emosionada de avlarmos de esta lingua ke yoró, teniash ke verla !!!!!! eya mos ambeza mucho en muestras reuniones.
Esther Jerusalmi muestra matriarka, Istambulia mos alegro la tadre kon kuentos de djoha i dichos.
Izimos omenaje a diversas personas ke asendieron la hanukia simbolikamente.
El Coral Angeles i Malahines del CIB dirigido por el Profesor José Behar, fue muy aplaudido, las 8 kandelikas, La yave de Espanya, Joli Joli, El Rey Nimrod, Yerushalaim, Maotzur i mas i mas…. a kada musika la prof. Cecilia dava una eksplikasion, les enkanto las katikas i kantavan kon mosotros, una tadre en verdad muy alegre, terminamos kon bevidas, pan de espanya, roshikas i kosikas …… todos demandando ke lo agamos de muevo,
Saludosos ke estemos si kere el Dio, ke puedamos fiestar este diya por mucho anyos mas, i en mas civdades i paises, amen,
Stella Garber
Rio de Janeiro
Brazil
Es maraviyozo meldar los biervos de Stella Garber sovre la komemoracion del Dia Internasional del Ladino en Rio de Janeiro. Felisito a vozotros por este lavoro i ke venga otros en los proksimos anyos.
Semanada buena i gracias
Reginaldo