eSefarad Noticias del Mundo Sefaradi
Keridos amigos i amigas
En el Jewish News dmeldi un artikolo sovre la Bar-MitSva ke se ve komo una bendisión para el padre i el ijo. Este artikolo fue prezentado por Yossi Aron.
Saludes a todos
——————————————————————————-
EL BAR-MITSVA ES UNA BENDISION PARA PADRE I IJO
En mis atividades sosiales i profesionales vide a munchos Bar-Mitsva ninyos. Unos venían para la seremonia i otros eran invitados. En Melbourne fueron mis ijos ke izieron sus Bar-Mitsva i oy nos vamos a YERUSHALAYIM para selebrar la Bar Mitsva de los nietos. Ke esensia tiene esto i ke se pasa una vez ke fue echo? ay koza ke se keda? Malgrado las intensiones buenas eksprimidas, el diskorso ke fue echo kon las palavras dichas por el rabino uno se demanda si el djoven va ser atado a la relijión en el futuro.
En la sinagoga se va meterse en un Talit ermozo, ma es ke se va meter en Tefillin despues.? Kuando sera visto en el Kal la próksima vez? Vamos a ver komo sale el Bar-Mitsva en los sirkolos ortodoksos.
Sera un evenimiento de un dia o un proseso de munchos etapes? Ay «anahat aTefillin» ke se praktika unos dos meses antes de la Bar-Mitsva. Se trata de los amigos de la misma edad i en el mismo punto de vida. Se dize «Le haim» al fin del servisio. En medio de la semana yaman al djoven a la Tora por la primera vez. Despues se aze un pranso chiko sin esperar ke sea Shabat. Se pasa en frente de los amigos. Se akompania por un otro «Le haim». Despues ay el Shabat con mas partisipasión. Kisas se melda la Parasha entera i se aze una adision komo «Devar Tora» en el Kidush. En munchas komunidades ortodoxas el djoven melda «Pshetl’ una derasha Talmudika eskrita por el. En djeneral todo ke se va pasar el proximo Alhad o en el Aniversario antes de Shabat se aze de manera modesta i es mas memorable i signifikativo ke en otros sirkolos.
El punto sentral en el Bar-Mitsva es la yamada a la Tora i no kaye solamente al ijo de tomar formalmente parte. Le kaye al padre tambien de resitar una bendisión. «Baruh Shepearani Meonsho Shel ze» / «Bendicho sea El ke me libero de la responsabilidad [Literalmente del kastigo] de este ijo».
Los orijines de este beraha se topa en el Shulhan Aruh, en Orah aHayim en las leyes de SHEEHEYANU ke se resita en okaziones espesiales. La interpretasión popular es ke asta la edad de Bar-Mitsva el padre es responsable por el mal ke aze el ijo. Agora kon sus aksiones el ijo toma la responsabilidad antes de el Bar Mitsva i despues, porke el padre remersía el fakto ke el ijo sufrira agora de las konsekuensias de sus aktos. El padre es liberado.
Tenemos ke analizar la seremonia de Bar-Mitsva. Kuando es ke el padre resita la bendisión? No en el momento kuando el ijo tiene 13 anyos, pero kuando aze su primera Aliyah a la Tora. Ke es lo ke aze? Resitar en frente de la komunidad i azer la bendicion «Bendicho sea Adonay, nuestro Dio ke nos eskojió entre otras nasiones i nos dio la Tora, Torah de realidad planteando vida eterna al adientro de nos».
Ay munchos momentos en la chikes ande los parientes no saven ke va ser del ijo. Ma kuando el ijo aze su deklarasión i ke el aksepta la manera de la Tora apresiándola, ansi el padre konose ke no ay nada de negativo en el ijo por kualo el es responsable. El oposito se pasa i el ijo entiende, i el padre puede deklarar en publiko ke no tiene duvdas o espanto. Esto implika ke el ijo aksepta el kamino tradisional. Meresemos tener ijos ke sigen las tradisiones de nuestros padres.
Trezladado por Shimon Geron.- Sydney
Fuente: Ladinokomunita
