eSefarad Noticias del Mundo Sefaradi
Keridos amigos i amigas
En el Jewish News de mayo tenemos el artikolo del rabino «Daniel Rubin» tratando del atadijo ke los Judios tienen kon Israel.
En 2020 pensava de azer 2 viajes a Israel. Uno en Marso i el otro en Oktobre. Pero komo entravan en kestion otras kozas tuvo ke anular sus planos. Dizia a su famiya ke no puedia asperar para irse a Israel. Malorozamente mismo oy no se save kuando sera avierto el kamino. Lo ke enfortesio su deseo de irse a Israel, fueron los evenementos en el Medio Oriente al ver ke Israel estava en una trauma kon la gerra entre Hamas i Israel. Pensava a muestros ermanos i ermanas en el fuego. El ANGST se avia amplifikado kon las novedades i el aktitud verso Israel de todas partes del mundo. Uno se demanda porke los Judios se van a Israel kuando ay tanto violensa i tensiones?.
Saludes a todos.
EL ATADIJO DE LOS JUDIOS KON ISRAEL
Lo admete ke el Puevlo Judio esta divizado sovre Israel oy mas ke antes en la istoria. Se pasa oras en la Media a ver las vistas sovre lo ke es Israel i lo ke deve ser. Enfrentamos kritisizmo arientro del pais i afuera. Ke es ke mos atira a Israel? Un pedaso tan chiko de tierra? Kree ke no ay solamente una repuesta a esto. Depende de las relasiones ke tiene uno kon Israel i sovre sus eksperiensas komo individuo. Para unos Israel es la tierra istorica de la Biblia. Para otros es la jeografia o la sinyifikasion relijioza. El pensa de avlar de la fuente de la relasion ke los Judios sienten por israel. Mismo kuando Israel se topa luchando por su egzistensia, munchos se merekian kon lo ke se pasa ayi. El rabino Dessler en su livro «Michtav le Eliyahu/Letra a Elijah» poza esta kestion. Malgrado ke despues de 2000 anyos de egzilio, el amor se keda en muestros korasones. Komo es posivle? Israel no representa el sentro nscional komo las otras nasiones ke se olvidaron de sus patria despues de un tiempo largo en egzilio. La raiz de muestro amor es su sanktidad en la muestra Tora ke dize ke el Dio es Santo komo es arientro de kada uno de mosotros. No egziste una erensia en la alma ke viene de muestros padres i muestras madres. HASHEM les avia prometido a esta tierra. Arientro de kada alma ay la sanktidad ke mos konekta a la sanktidad de Israel. La Tora dize «Israel es una tierra ke el Dio eskrutiniza siempre i los ojos del Senior vuestro Dio esta sovre el empesijo i la fin del anyo. Ayi se topa la fuersa de Israel i es ayi ke uno se aserka del Dio. Es en esta sanktidad ke muestras almas se konektan a la tierra de Israel. Kon esto viene responsabilidad. Israel nesesita de tener un standard i ser una luz al mundo. Un lugar ande el mundo mira. Moralmente i etikamente. No ay ke olvidarlo.
Trezladado por Shimon Geron, Sydney
