eSefarad Noticias del Mundo Sefaradi
A ken se yama artista? Ke sinyifika ser artista verdadera?
Si no egzistiya el arte, seriamos personas sin sentimyentos. İmajinavos sin pintura, sin musika, sin literatura una vida sin emosyon, sin pensar, kurto muy vaziya.
El arte tyene ekeftos pozitivos. Por empesar un pintor en pintando, un eskrivano en eskrivyendo amostra su mundo interior esta manera apoya su salud mental.
Una de las kontribusyones mas emportantes del arte es, ayudar a konoser muestros sentimyentos i pensamyentos.
El arte entretyene las personas, da lisyones de vida i aze pasar el tyempo en bueno.
En resumen, kreamos arte para komunikar, para edukar, para informar i evokar sentimyentos.
Dizen ke el arte no tyene edad. Yo esto dakordo, syertas amigas me demandan “ke se puede azer a muestra edad”?
Munchas kozas se puede azer, aki ay un egzemplo…
ANNA MARY ROBERTSON MOSES
Kuando teniya 76 anyos mi marido muryo, los ijos kazaron, se fueron de kaza, por primera vez kedi sola. Teniya artrit i mis manos yenas de dolores. Solo en pintando no sintiya dinguna dolor. Kon los dos groshes ke teniya, fui me merki furchas empesi a pintar vistas ermozas, kavayos, el nasimyento del sol, la tradrada, la inyeve.
Un dia un koleksyonaryo vido mis kuadtros tanto le plazyo todos los merko. Un poko tyempo dospues mis ovras estavan en MOMA en el museo de arte moderno.
A los 80 anyos mi foto estava en la revista LİFE.
De 76 asta los 100 anyos pinti mas de 2000 tablos.
Durante este tyempo entendi ke munchas kozas mos keda aryento fin ke avrimos la puerta.
Si la alma tyene kolor nunka no es tadre i nunka ovidesh ke el arte no tyene edad”. Granmama MOSES.
Forti BAROKAS
Fuente: turkisrael.org.il
