eSefarad Noticias del Mundo Sefaradi
Asta unas kuantas dekadas, esta kostumbre ermoza egzistiya en todas las komunidades de los sefaradim, i entre los djudyos del oriente tambien.
En el livro de Vayikra (6, 6) eskrive: «Fuego sera ensendido de kontinuo sovre la ara (Mizbeah); no se amatara».
Lamentavlemente, aze syenes de anyos no tenemos Bet Mikdash, i es solo por komemorar el servisio de los Koanim en el santuvario ke se uza en todas las sinagogas de deshar una chika luz o flamika de fuego asendida en algun atuendo, o kopa, o lavador yeno de azeite.
En la azeite, jeneralmente, flotan mechas asendidas por djente (mujeres o ombres) ke vienen al Kal, echan un poko de azeite al «depozito» de azeite, en donando alguna suma chika de parás, i en rogando a los sielos, kada uno por la solusion de sus belas i problemas, (o para dar loasiones al Dio por su salvasion o su reushita en kualkier ovra).
Las rogativas, en echando azeite al Kal no estan eskritas en ningun livro, i kada uno del puevlo se adresava a muestro Padre en los sielos simplemente komo le deziya su korason, «komo el i su alma lo saviyan».
Muchos uzavan azerlo en «dias de Sefer» ke son dias de lunes i djueves en los kuales se kita (en la tefila de la manyana) el livro de Tora para meldar un paragrafo chiko de la perasha.
Yehuda Hatsvi
Tel Aviv – junio 2009
