De la pluma de Sharope: VENTO DEL NORTE I EL OSEANO

En esta seksion Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.

VENTO  DEL NORTE I EL OSEANO

La noche en el silensyo
Kon la luna banyando el sielo
Me akodro ke senti un immenso dezeo
De abrasarte en un largo bezo…

Estava kon mi kavayo, paseando en la playa
El, libre, yo, vistida solo de una kamiza blanka
Mis pies desnudos, karesandole la tripa
Penyando de mis dedos su larga crinera.

No teniya de menester de saver ke azer
Andavamos asigun su buen plazer
A vezes le dava ganas de trotar o de galopar
Supito se kedava para goler el aver i relinchar*.

Vento del Norte era su nombre
Un grande kavayo blanko, magnifisente
Karinyozo kon mi ma ravyozo kon la gente
No partiya kon dingunos, estava kon mi siempre…

Akeya noche en la playa dezierta
Paseyimos al bodre de la mar enlokesida
Las espumas blankas altas i briyozas
Akompanyando el ritmo de las olas..

Mis pensadas me aharvavan komo estas olas
Me yevaron kon eyos a los profundos
No keriya detenerme ma ir kon eyos
Ande las rokas no estan mas, muy leshos.

Kije tomar tus manos, mirar a tus ojos
Entender tu amor, konoser tus bezos
Kije ke vengas kon mi a los leshos
Kon tu alma deznuda i biervos karinyozos

El oseano jugava kon las piedrizikas
Su kanto era dulse melodiya a mis orejas
La luna le aviya emprestado estreyikas
Luzes falsas  kemavan entre las olas…

Estava kayinte i sudavamos Vento i yo
Malgrado el ayre ke karesava muestro puerpo
Jugimos kon las aguas, era tan divertido !
Nadimos i korrimos en el suelo mojado…

Deke no estavas akeya noche ?  Deke ?
Kijie tanto ke me detengas fuerte, mas fuerte..
Ke mos arrezvalemos en la arena kayente
Sintir ke me amas …..sin mizmo verme !…