eSefarad Noticias del Mundo Sefaradi
OY AVLAREMOS DEL SOL I DEL TIEMPO,
KONVERSAREMOS ENTRE MOZOTROS
MA….
Buenos diyas desde Istanbul kon el sol briyando este diya de Avril…
Estan las 9 de la demanyana pasadas i ya ay mas de 3 horas ke esto en pies ! Ke keyf es de asentarme en frente de mi chikichiki (koza kon el kual se eskrive) i estar kon vozotros, kompartyendo muestra vida de kada diya kon los ke keremos bien…
Por seguro ke ya meldi presto presto todas las gazetas, magazines, revistas ke yegan a mi Carolina (es el nombre de mi komputador) diya diya…. No es ke esto me plaze enormamente ma dizen ke es bueno de saver lo ke se pasa en el mundo i espesyalmente en las komunitas judiyas…
Oy me alegri kon el jurnal ke me yega de Brazil www.ruajudaica.com. Es en meldando des de anyos este jurnal ke me ambezi a entender todo lo ke eskrive en Portuguez ! Yo i el Portuguez ! Lollllll ma parese ke tengo kavesika blanda…. Kuando me dizen una koza diez vezes, eskapo por entender Mashallah !
Digo mil bavajadas sin dizir lo ke kije dizir kuando empesi a chikichikeyar (eskrivir) este mesaj ! Vos dishe ke senti alegriya… Komo no ? Grande alegriya de saver ke en un anyo i medyo serka de 5.000 Ukranyanos, todos judyos, izyeron Aliya a Israel. Unos 50 de eyos son kreaturas ke empesaron a ir a la eskola…
Alegriya… Alegriya ! Entre eyos ay bebes i una mujer de 82 anyos…
Bruhim habayim…. Bruhim habayim ! I ay otros i otros de Fransiya en prinsipyo… Son sangre para las venas de muestro chikitiko payis ke los aresive a brasos avyertos. Kual otro payis arresive los emigrantes ansina ?
Les viene todo modo de arabos i gente de Afrika ke no saven kualo azer kon eyos. Se lamentan, se keshan ma no tienen otro remedyo ! Deven de arresivirlos porke los ke ya estan en sus payis les romperiyan todo, matariyan kreaturas i saserdoses, degoariyan, meteriyan fuegos en sus kazas, en sus iglesyas en las eskolas i en los hospitales ! Les ambezaron a obedeserles! Ansina es… El mundo entero se esta muryendo de sar de los terroristos por lo ke azen barminnam! Tengo friyos solo de pensar…
Pormodo de estos, mizmo si dan razon a Israel, toman sus partidos i estan prontos a las mas grandes injustisyas solo por tener paz en sus sivdades…
De no kreyer ma ansina es ! Por seguro ke tienen sus profitos fiskales tambien… Ke golor de perfumo tienen los petro-dolares ! No embarasa si son suzyos… pretos…. ensangreyados… embatakados ! Los karesan kon amor i son sus esklavos… Viva Eurabia !
I…. Ke pensash de Trump kon el talith i la kravata roz ? Es el Obispo o el pastor ke se lo dyo ke lo bueno miyo….. Su blankura chafta al ojo allado de los pretikos… No ? Esta briyando komo el sol de esta demanyanada….Guadrado de nazar i de ojo malo ! El se demanda si se kemaron por estar demazyado tiempo en la tripa de sus madre i los otros pensan ke lo kitaron dayinda krudo !!!! Todo bueno ke tengan los unos i el otro
Kedavos alegres i sanos i rezyos.
Sharope Blanco
Sefaradimuestro
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
Ver todos los artículos de esta sección >>
