De la pluma de Sharope: LOS SAPATOS KOLORADOS por Sharope Blanco

Ver todos los artículos de esta sección >>

LOS SAPATOS KOLORADOS

Aviya arriva en un sako attados
Ensima de l’almaryo guadrados
Kozas viejas en buen estado, olvidados
Mos aviyan servido antes munchos anyos…

Kuando se aserko Pesah para alimpyar
Barrir, lavar, tomar polvos i fregar
Travi el sako d’arriva para mirar
Si aviyan kozas para guadrar, dar o echar.

Vide vistidos ke kemavan mis dedos
Aviyan pasado anyos i mas i mas anyos
Los rekuerdos siempre kedan i no s’efasan
No se si se durmen i supito s’espyertan…

Dezatimos los anyudos, lo d’aryento kitimos,
Avrimos bogos, sakudimos, el palto lo echimos
Me maraviyi de ver jugetes dayinda guadrados !
I los vi, en un kuti al fondo, briyando i muevos !

Un tiempo, en los anyos sesenta
Se uzavan muncho, komo agora,
Sapatos kolorados de lustrin, elegantes
Los vistiyamos kon dantelas i guantes.

Me los aviya metido unas kuantas vezes
Solo para unas okazyenes muy spesyales
A mi aniversaryo por mis dizi ocho anyos
I en unas kuantas bodas i espozoryos.
El, los aviya remarkado antes de verme a mi !
Los talones finos le plazyeron mas de lo ke le konti !
Son por sus miradas de braza ke tanto me riyi
Sin kerer, de esta flakeza maskulina me burli…

Diyas i diyas a akeya fiesta pensi i me demandi
Komo konfiar en alguno ke se olvida ansina de si ?
Mostro jantiyesa, se intereso i se namoro de mi
Pormodo de los sapatos kolorados ke me kalsi ?

Dayinda briyan mis sapatos en sus bogo
Una soriza me viene akodrandome de akel mansevo
De mis piernas, pies i sapatos i komo los alavo !
Ke tonteriya es de azer komplimentos sovre esto !…..

Sharope Blanco
Sefaradimuestro

En esta seksion Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.