eSefarad Noticias del Mundo Sefaradi
Ver todos los artículos de esta sección >>
LA VIEJES
I………..GOZAREMOS DE LA VIDA TODO EL TIEMPO KE PUEDEMOS PORKE ES UN REGALO DE DI-O !
LA VIEJES ?
En la manseves, la ermozura es un aksidente de la natura. Ma en la vejes es una ovra de arte. Ademas, enviejeser es La savyedura de aprovecharse de sus eksperyensyas.
Ser maduro es saver bivir en paz kon lo ke es imposivle de trokar i ser kontento de lo ke tenemos. Saver render grasyas al Sielo mizmo kon dolores i enfirmitad. Topar el gozo de bivir en todas las sirkontensyas .
Kuando enviejesemos, la ermozura se transforma en una kualitad interyor. Para el profano, la tresera edad es el invierno, para el savyo es la epoka de la rekolta…
Ser maduro es bivir en paz kon lo ke es imposivle de trokar i ser kontento de lo ke tenemos. Saver render grasyas al Sielo mizmo kon dolores i enfirmitad.
Topar el gozo de bivir en todas las sirkontensyas .
En los ojos de la manseves ay flama, el tumulto del dezeo, en la vejes los ojos reflektan la luz, el briyo de la maturitad.
No es viejo el ke perye sus kaveyos o tiene rugas en la kara ! El viejo ke guadra sus esperansas, el amor ardiente en su korason, tiene fe en si, konserva mas o manko su salud i su konviksyon ke es solo el puerpo ke enviejese, kedara siempre mansevo.
No somos viejos, bivimos munchas primaveras !
NO OLVIDAREMOS KE LA VIEJES ES EL PRESYO DE UNA VIDA LARGA, DIYAS ERMOZOS, EKPERYENSYAS DULSES O AMARGAS DE LA EGZISTENSYA KE DI-O MOS REGALO… ALELLUIYA…
Por un tiempo i mas un tiempo Auzate
Por un tiempo i mas un tiempo pasensya
Siempre guadra tu fe i ten konfiensya
I NUNKA tornate atras I arepiyentete !
SHANA TOVA
HAG SUKOT SAMEAH
I TODO BUENO EN 5778
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
