eSefarad Noticias del Mundo Sefaradi
Ver todos los artículos de esta sección >>
DE LA TADRE A LA NOCHE
(Semi finalista en el konkurso del Centro de Estudios Poeticos – Madrid)
Miro al horizonte.. El sielo se abraza… Avagar, abasha la noche.
El disko kolorado va dezapareser en las aguas de la Marmara.
Son sus d’alkavos rayos de la kolor de la dulse naranja
Es la hora de las ventanas insendiadas por las flamas de la tadre…
Es la hora del ritorno de los barkos aserkandosen sin bruido.
Los peshkadores entran al chiko puerto.
Los veygo mover avagar, no se les ve la kara..
Empeso el reignado de la Solombra.
Es la hora del paseo de los namorados kansados del diya,
Los veygo kaminando mano kon mano sin dizir nada
A vezes s’abrasan en un largo bezo enserrados en sus mundo,
Etranjeros a lo ke no son eyos… Sodros i siegos al entorno…
Es la hora del repozo del parke. Los moskitos baylan..
El vedre no es mas la kolor insolente… Los pasharos se kayan
Es un profundo silensyo en el fresko, las palomas aunflan sus plumas
Se aserkan en sus amistades eskondidas
Es la hora ke leshos del esuenyo me topo sola kon mi mizma
Amoroza apasyonadamente de mi pasado, mizmo si no estas.
Ken sos ? Ke es tu nombre ? Sos tantos !
El pezgo de un rekuerdo en mis ombros.
Sharope blanco
SEFARADIMUESTRO
Istambul
