De la pluma de Sharope: BIVIR / TOMENME ENTRE VUESTROS BRASOS… por Sharope Blanco

Ver todos los artículos de esta sección >>

BIVIR

La persona ke nunka se yerro es el ke nunka tuvo eksperyensas.. A.E.

Elmundo es un lugar peligrozo para bivir……. Si ! Ma no pormodo de las personas negras. Pormodo de las personas ke no azen nada para mijorar las kozas..
Albertiko E.

Komo apresyariamos la luz si no egzistiya la oskuritad ?

TOMENME ENTRE VUESTROS BRASOS…

Tomenme entre vuestros brasos mis rekuerdos
Sosh inolvidables… Ermozos, tristes o amargos…
Los rekuerdos kedan… Biven eternelamente.
En las fotos, en los eskritos, en los espejos..
Siento en mis oyidos los sonidos de tus biervos.
Somos mozotros ke mos despegamos, malorozamente
Partimos sin kererlo a la hora eskrita en muestra frente…

BIVIR

Bivir  komo si «ayer» no aviya egzistido
I komo si no avra «manyana»…

Bivir komo si el sol nunka se eskonderiya
I komo si la luna no mos apareseriya.

Bivir komo siempre amariyamos
I nunka mos espartiriyamos

Komo siempre seriyamos feliz i rieriamos
Nunka konoseriyamos la tristessa I los yoros

Portanto…..Viene el diya, akel krual I sin piadad
Empesan las tormentas i bola la serenitad

Ke mos kedan mas de los rekuerdos ?
Ke mos konsola sino los biervos ke sintimos ?

Ke bivimos si no vimos el mundo I siegos fuimos ?
Los ojos aviertos ma los oyidos tapados ?

Ken fuimos sino esklavos de muestros dezeyos ?
Ke dimos I ke tomimos mas del oro ke teniyamos ?

Ke mos disheron unos, ke no komprendimos ?
Ke salyo i ke mos ambezimos de todo lo ke vimos ?

Akel diya viene sin ke mos apersiviemos
I mos demandamos «Kuando pasaron los anyos ?»

Mos parese tener vente anyos en los setenta….
Bivir, poko o muncho, nunka mos abasta.

Kuryozo, mos olvidamos ke somos simples mortales
I ke devemos irmos leshos kuando yega la vejes

A vezes, mizmo, muncho mas antes, sin kerer..
Komo si el Angelo Preto no teniya nada otro de azer !

———————————————-

Komo de dulsor es de oyir
komplimentos sovre unos versos
ke yegan del korason….

Ke dulse es la kolor rozeada
de las karikas kuando los
komplimentos salen del korason…

Komo entenderiya la valor de mis amigos
Si no me yegariyan sus biervos karinyozos ?

Sharope blanco
SEFARADIMUESTRO
Istambul