De la pluma de Sharope: MI KAZA ES ISRAEL por Sharope blanco

Ver todos los artículos de esta sección >>

Kon el avatiah o kon el falafel,
I Yoram Gaon ke me muero por el
No puedo bivir leshos del Kotel
I no importa Tel Aviv o Beit El

Komo no amar al norte la Galil vedre i freska
Muestra sangre, las aguas del lago de Tiverya !
La joya i la Reyna del Desierto, Beersheva
La elegante sivdad i las plajes d’Herzeliya !

Israel, el puerto kalmo ande vengo para abrigarme
De todas las angustyas de este mundo i aregalarme
Israel ke me avre sus brasos komo una madre
Mi orgulyo i mi kastilyo a la kuala siempre ritornare.

Avlo kon las gaviotas en los bodres de Yafo
I baylo arezvalandome de la kolina abasho !
K’ermozo es admirar d’arriva el viejo puerto !
Yafo atika i Abolafya.. Yafo kom’un suenyo !

Kamino en las kayas de Tel Aviv kansada del bruido.
Todos estan impasyentes, deven yegar a sus echo
La mar sin kavo al horizonte, ke splendor ke briyo !
Veyo los mansevos, las kreaturas alegres i riendo.

Vo a Haifa kon treno al puerto i al Carmel arriva
El Sanktuaryo Bahai briya i Gan ha Em es solombra
Diya de relakso para pasear komyendo humus i pita
Tomar un kafe kon las Amigitas i gozar de la vida.

Sharope Blanco
Estambol

SEFARADIMUESTRO