De la pluma de Sharope: DOS KUENTIZIKOS DE VIEJIZIKOS por Sharope Blanco

Ver todos los artículos de esta sección >>

DOS KUENTIZIKOS DE VIEJIZIKOS

EL MANKO DE KUDYADO DEL SERVISYO FUNEBRE

El servisyo funebro para la seremoniya del enterrimiento yego a una ande se aviya murrido una mujer resamente.

Los portadores estavan yevando la mujer abasho del apartamente kuando sin kererlo chaftaron el kadavro a la pared de las eskaleras. Oyeron un lamento i aparesyo ke la mujer biviya dayinda.. Akeya mujer bivyo unos 6 anyos mas, i dospues kuando le vino la hora se muryo.

El mizmo servisyo funebro vino a tomarla i kuando salyeron afuera para abashar las eskaleras el marido grito » Attensyon a la pared ! No kero ke la chaftesh ni por aksidente ! «

***

EL ANIVERSARYO DE 50 ANYOS DE KAZAMIENTO

Un couple de viejizikos se fueron a un ermozo restaurant para selebrar sus sinkuenten aniversaryo de kazamiento. El garson los arresivyo kon sorizas i les aparejo una meza romantika al lado de la ventana.

El viejiziko le demanda a su mujer :

-Mi reyna, ande te keres asentarte ?

– Aki, le responde la viejizika.

-Mi prinssesa, kieres un aperitivo por empesar ?

– Me gustaria un vino

– Mi angelo, ke te gustariya enkomendar ?

El demanda el menu i enkomenda lo ke van a komer akeya noche.

El garson ni se kreye las orejas ! Tanta galenteriya a esta edad ?  «El hombre esta dayinda namorado de su mujer !» pensa el muchacho…

Kuando la mujer se alevanta para ir a las toilettas, se aserka pishin allado del ombre i le demanda al oyido  komo puedyeron kedar namorados, el i su mujer, por tantos anyos…

El viejiziko lo mira tristamente i responde :

– Nada de esto muchacho ! Por las karrotas santas ! Es ke no me akodro de su malditto nombre !

Le disho esto….. Ma en kaza estava de miel i de krema entero por su espoza de 50 anyos…. Todos los mizmos !

Sharope blanco
SEFARADIMUESTRO
Istambul

Check Also

Şalom Gazetesi: Enkontros de Alhad por Alp Ethensel

Recientemente, gracias a la amable invitación de Karen Şarhon, tuve la oportunidad de asistir a …

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.