eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
El livro de Matilda Koen Sarano :»Kuentos de todos los tiempos- La Sosiedad»
Tengo el onor de eskrivir unos de mis pensamientos sovre el muevo livro de muestra Matilda: «Kuentos de todos los tiempos- La Sosiedad», Ed. S. Zack, Yerushalayim, 2012.
Kero empesar de esto ke fui una de las primeras personas a las kualas Matilda avia kontado sovre su entension de eskrivir un livro muevo de kuentos populares en muestra lingua tan kerida.
Despues, kuando la kacha ya estava pronta,eya me la mando para ke eksprese mi opinion i me alegri muncho ke ya mos nasio esta mueva koleksion, tan emportante.
Matilda mos konta en la entroduksion ke el lavoro sovre este livro le ayudo i la akompanyo a alivianar un poko su dolor despues de la muerte de su kerido Aharon (ke era tambien muestro kerido).
Kon muncho plazer adjusti tres de mis kuentos: dos populares i uno personal, para ke se toparan en el nido emportante de Matilda. Ademas uno de mis kuentos aparese en el disko ke fue aneksado al livro.
El livro kontiene kuentos i legendas, ke pasaron de uno al otro oralmente, ke sus eskritores no son konosidos, ke no tokan a un tiempo espesifiko o a un lugar espesifiko.
Tambien, enkontramos en los kuentos ke son mas realistikos kuentos personales komo mi kuento «La uva de muestro kurtijo» i otros muy pikantes i atirantes kon poentas ke, en vezes son un poko non realistikas, i ke paresen fantastikas.
Esto todo apartiene al folklor jeneralmente, i a muestra kultura, espesialmente.
Vos rekomendo de adjustar el livro a vuestra biblioteka de ladino, ansi podrash enrikeservos de entrun proyekto cultural, komo siempre dezeamos.
Medi Cohen Malki, Yerushalayim, Disiembre 2012
Hanuka Alegre a todos vozotros.
