De la meza de Medi: El Kahl de Yemin Moshe

Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.

Ver todos los artículos de esta sección >>

El Kahl de Yemin Moshe

Esta vez, vos eskrivo de un tema ke a mi personalmente me toka muncho. Se trata del Gran Kahl Sefaradi de Yemin moshe, ke se topa en la kaye Malki del kuartie.(koza ke toka a mi famiya).

Esta vez me bazi sovre las kozas ke eskrivio mi pariente Haim Gabay, i ke fueron redaktadas por mi tiyo Hayim Miles, ke es tambien el ayudante del hazan de este kahl.

EL Kahl de Yemin Moshe fue fraguado, komo kontribusion del filantrop por Yehuda Tura para los djidios ke yegaron al lugar de la sivdad vieja, al kuartie,i su konstruksion fue kompletada en el 1887.

Las lajas del kahl I el Aron Hakodesh, fueron enportados espesialmente, i las lampas son echas de vitrajes de Morano.

Podemos dizir ke la istoria de Kahl es la istoria de kuatro epokas:

• La primera: para los ke salieron de las murayas de la sivdad vieja i ke fueron de klases sosiales bashas, i ke se arresentaron en este kuartie dezertado, non protejado I aleshado.
• La sigunda epoka fue esta ke vino de despues de los pogromes del 1936, ke trusho al lugar moradores muevos kon buenas kapachidades ekonomikas, koza ke  ayudo a restorar el Kahl de muevo i de adjuntarle pinturas muevas i entruna fragua ke sirvio komo kahl chiko para minyanes i para todos los dias de la semana. Asta el 1947, fueron fraguados en el kuartie, tambien un banyo I una panaderia.
• La tresera epoka empesa kuando ezbrocho la gerra de endependensia, siendo ke el lugar se topava en la frontiera, el fue abandonado por la mayoria de sus moradores. El kuartie i sus kazas sirvieron komo pozision de tiro i de kombate de muestros soldatos,  frente el lejion Jordano. Despues de la gerra, los moradores de antes, no kijeron tornar al lugar, i las kazas dayinda kedaron abandonadas.
• La kuatrena epoka fue kuando empeso la immigrasion de los Djidios de la Turkiya i ke munchos de eyos yegaron a Yemin Moshe, espesialmente de Izmir. Eyos vinieron a estas kazas kaje destruidas, sin puertas, sin ventanas i sin tejadas, kon burakos grandes en las paredes,  ke fueron kavzados por la gerra. Esta aliya de Turkiya, kontinuo asta el medio de los anyos 50.

Los Turkanos toparon el kahl abandonado i serrado i se adresaron a sus patrones para resivir su yave. en el 1951 el empeso a funksionar de muevo (munchos kazamientos de mi famiya fueron ayi, i tambien el de mis djenitores).

En Yemin Moshe kresieron tambien una atmosfera i un modo de vida muy espesiales. Todos los uzos de Izmir bivian ayi: la lingua avlada era el Ladino (en Ebreo lo yamavamos Spanyolit), de las kazas aviertas suvian los guezmos de las borrekas i de los boyos, i se sintian kantes en Ladino. En los bakales vendian muncho el kashkaval, la lekerda, el kezo de kaldera i otras kozas ke les plazian a estos djidios de Izmir.

Mezmo los muevos emigrantes de Kurdistan, ke yagaron mas tadre, se ambezaron el Ladino I muestros uzos.

Toda esta ermozura se mesklo kon la amistad i la kalor, koza ke, mas tadre, fue destruida por una inisiativa kruela, triste i yerrada. Los tiros i el peligro de kada dia, no mos espantavan, i ansina pasaron 19 anyos, i kon eyos, la gloria i la alegria de muestra chikes i de muestra djuventud..

Despues de la Gerra de Sesh Dias, kuando el amenaso Jordano dezparesio, las autoridades desidieron de trokar el kuartie a un lugar de artistas, i eyas  empesaron a evakuar la djente de sus kazas, a kambio de pokas paras,  basho el titulo de :»Ekspropriasion para menesteres publikos».

Del 1967 asta el 1979, Yemin Moshe se vazio de sus moradores, i las kazas fueron vendidas a artistas i  a famiyas muy rikas, ke las restoraron.

El Kahl, tambien fue restorado por un architekta ashkenazi, ke mezmo troko las kolores de las pinturas orijinalas.

Ultimanente, el Kahl fue restorado por la Asosiasion Sefaradi ke lo mantiene, i las kolores del empesijo tornaron a sus paredes i tambien a su plafon.

Haim Gabay dize: «Tenemos el mazal ke muestros djenitores, malgrado ke abandonaron el kuartie, kontinuaron a vinir al lugar los dias de Shabat, los Moadim i en las fiestas».

Mozotros, la mueva jenerasion, estamos kontinuando de vinir al Kahl mezmo si no semos muy relijiozos.

Oy dia, el kahl esta avierto los dias de Shabat i en la fiestas i tambien los dias de lunes i de djugeves para las Bar Mitsvas.

Esperemos ke siempre el Kahl de Yemin Moshe kontinuara a ser la entorcha de los sefaradis orijinarios del kuartie i de sus desendientes i para todos en el prezente  en el futuro.

Medi kohen Malki
2012 – Yerushalayim