eSefarad Noticias del Mundo Sefaradi
Tomando el vapor aziendo idas i vueltas a Haydarpasa i Kadikoy, se pasa por Tophane i ayi se toma la NARGILE. Se pasa del Ponte de Karakoy i se toma un TE ESPESIAL ke lo yaman DEMLI. Los Turistos echan una mirada i ven djente abashando del vapor i suviendo en los tramvayes. Ma kuando empesa a eskureser, el lugar es trankilo. Durante la Epoka Bizantina a este lugar lo yamvaban HASKOY. Los KARAIM Judios vinieron aki. Karakoy kuando se kompara kon los barrios vezinos komo GALATA i el TUNEL ya tiene oy un aire mas kalmo.
El dia de Alhad pasando de Karakoy a Kadikoy en vapor, nos damos kuento ke de dia en dia las kozas ke kontavan muncho se estan perdiendo. Antes de suvir al vapor azemos un paseo en Karakoy. Edifisios komo OMER ABED HAN,las iglesias de IONNIS i SURP KRIKOVITCH,la Polisia/el KARAKOL VOYVODA,la iglesia St.ANTOINE i el KARAKOY PALAS,i la Meskita YER ALTI CAMII ande se izieron las orasiones en Turko por la primera vez, i las estatuas de mujeres delantre del Banko de Vienna, son kozas ke atiran mis ojos.
Istanbul entre los metropoles grandes del mundo, es una sivdad ke se esta trokando kontinualmente. El presio ke se paga por esto es la piedrita de munchos rekuerdos de nuestra chikez. Antes de tomar el vapor, en los dias de mi kumple anyo, me iva a BAYLAN PASTAHANESI para tomar un gateau. En estas kalejas viejas se sentia la golor del peshkado. En Karakoy avia la posibilidad de tomar un vapor para ir a kualkier lugar sin romperse la kavesa.Oy ay kadenas enteras de cafes i restaurantes, espandidos komo un virus, ma no tienen el mismo gusto i valor komo tenian antes. Mismo si ay mas variedad. Antes todo tenia mas savor i era mas profesional. Regreto muncho de no tener las mismas KOFTES/rissoles o las mismas bevidas en las Meyhanes/tavernas.
Kuando se mira a Istanbul del otro lado, a la parte Evropea, me demando ke se va sakrifikar. La Estasion de Treno de HAYDARPASA? Esta estasion nos dize «Esto en pies i no kero ke me tornen a un museo,un otel o un merkado»
El vapor se esta aserkando de KADIKOY i tengo ganas de ir al CHARSHI/merkado. Kero ver la variedad de objektos ke se venden. Paso por BAYLAN PASTAHANESI lugar de gateau i despues me vo a HACI BEKIR para tomar LOKUM/Turkish Delight. Delantre la Iglesia TAKAVER ay una tabela mostrando «KHALKEDON» ke era el nombre de este barrio en la Epoka Bizantina. Signifikava «Lugar de los siegos» porke el otro lado de SARAYBURNU era muncho mas lindo. Uno tenia ke ser siego para instalarse en Khaldekon. Mi kamino agora se dirija a YEL DEGIRMENI/Molino. Al tornar del Charshi/bazaar, oigo en mi oreja la kantika de Rafaelito. Una kaye nos separa. El molino abastesia toda la arina ke tenian menester en tiempo de ABDULHAMIT. Uvo un insendio en 1885 i despues vinieron aki famiyas Judias. Los apartamentos viejos de los Judios se kedaron ayi. En HAYDARPASA avian apartamentos konstruidos para los Alemanes kuando fraguaron la estasion de treno. En este barrio se topavan meskitas, iglesias i sinagogas. Avian eskolas ke tenian sus istorias, avia el HAMAM AZIZIYE/Banyo Turko.
Kuando la Turkia se izo una republika, en los anyos de 1950 i 60, las kazas se azian en beton i kon esto poko a poko, lo ke era viejo se perdio. Las minoridades partieron de aki i todo esto no trusho danyos grandes. Esto porke no trokaron a los nombres de las kayes, i los duenyos de las kazas no las vendieron. En YEL DEGIRMENI bive el eskrivano MARIO LEVI. El dize ke le gusta una sivdad de suvidas kon eskaleras/yokus.
De ayi nos fuimos a MODA. Mi padre kuando era mansevo era miembro de MODA DENIZ KULUBU/Un klub de mar. [yo i mi amigo Zeki nos ivamos a la playa de Moda. Komo no tenia paras, saltava a la mar de la eskala, i nadava a la playa. Zeki se yevava mis vestidos a la playa. Asi no tenia ke pagar una entrada. Zeki i yo una vez kemimos kaji a BURGAZ ADASI en alumbrando un fuego para gizar un peshkado]. A este punto de mi paseo resivi una yamada i mis amigos me disheron ke estavan aziendo sus kompras en los merkados diferentes. A eyos no les interesava Karakoy i en Alhad nos enkontravamos para ir a komer i ver unos filmos.
En ke Epoka de Istanbul vos gustaria vivir? Esta sivdad ke se moderniza mas i mas, kon unas plazas feas, sentros komersiales kon dijitales tiene fotos de un Istanbul nuevo. Vos plaze esto? O vos plaze el Istanbul viejo kuando la famiya entera salia en Alhad para pasear en el Bosforo, o tomar un MEZE kon el RAKI i mirar a las fotos de blanko i preto mostrando una istoria de 2700 anyos? Antes de yegar a una desizion ay ke echar un ojo a los albumes de famiya i ver las fotos de los avuelos i las avuelas. Uno se da kuento asi en ke mundo bivian.
Trezladado del jurnal Shalom de Estambul por Shimon Geron para Ladinokomunita
