eSefarad Noticias del Mundo Sefaradi
Keridos amigos i amigas.
En el «Jewish Report» ke es un jurnal mensual debaldes, tenemos el artikolo de «Robert Bartholomey PH.D».
El dize ke en tiempos de kriza la djente bushka a echar la kulpa a otros por sus problemas. Es parte de la kondisión umana. Agora se echa a los Chinos. Desde ke vino el virus la media sosial mostra a los Chinos komo djente suzia i ke meresen resivir lo ke les dan. Eyos komen kreaturas ke para los oksidentales son «pets/kompanyeros». Munchos de estas fuentes en djeneral son rasistas. A los estranjeros i los ke vienen de afuera los akuzan de traer infeksiones.
Saludes a todos
——————————————————————————-
CORONAVIRUS I LA BUSHKEDA POR «SCAPEGOATS»
En el Siglo 14 kuando avia la Plegaria/landre «Bubonic» a traves la Evropa, no la yamavan «Plegaria Europea»i era solamente»Plegaria»o»la Muerte Preta».
En general echaban las culpa a los Judios por meter tosigo en los pozos i por infektar a otros en direkto. Mataron a munchos Judios bazándosen sovre las rumores. Kazales enteros fueron eliminados en retaliasion. Kisas los Judios siendo asolados en jeneral, esto les ayudo a ser protejidos en tiempo de kriza, siendo forsados a bivir en komunidades asoladas, ande se praktikava la relijion i se lavava las manos antes de komer i de ir a la tualeta. Pero esto trusho sospechos al ver ke los Judios eran menos tokados por las hazinuras.
La Organizasión Mundial de Salud avia rekomendado de utilizar el nombre «2019-nCov» de manera temporaria. Egzijo ke se de nombres espesiales a las hazinuras ke infektan, deskorajando ansi de azer referensias a la djente i a los paises, animales i okupasiones. Rekomendaron de no servirse de términos ke puedan dar espanto. El buto era de evitar la stigma sosial. Desde ke salio Coronavirus los sivdadanos Chinezos, ke en jeneral son vistos komo fríos, oportunistos, imoral i komo djente ke kalkula, resivieron una akuzasión de mas. Demonizan a siertos grupos etnikos i de nasionalidades en tiempo de epidemia.
Esto se paso munchas vezes en la istoria. Komo el «FLU PANDEMIC» de 1914-1918 ke era nomado «SPANISH FLU». Poko importa ke esto no orijino en Espanya. Los espanyoles tomaron la kulpa sovre eyos porke aparesió en primero en la prensa popular. Munchos paises ke avian partisipado en la Gerra Grande no kijeron revelar a esta epidemia por no ser vistos por el otro lado komo djente flaka. Ansi los espanyoles fueron kastigados por ser onestos i transparentes. Los expertos no pudieron mostrar de ande venia esta hazinura por munchos anyos. Tenian 2 hipotezas. «La Baza Amerikana en ‘Fort Riley/Kansas’ i la Baza Britanika en «Etaples/Fransia». Pero el «Flu» nunka fue nomado «French o American Flu».
En 1892 avia la Epidemia de Kolera en los Estados Unidos. Echaron la kulpa a los imigrantes i refujiados Judios de Evropa, metiendo a unos mismo afuera de sus kazas i matandolos. Fueron forsados a ser egzaminados i umiliados sin tener una baza sientífika. En los anyos 1990 los de Haiti fueron estigmatizados por tener AIDS i HIV en los Estados Unidos. No desharon a sus ijos a irsen a la eskola kon Haitianos. Unos fueron harselados a harvados. Metieron a un estudiante en fuego. En 2006 el «Virus HINI» konosido komo el ‘Virus del Puerko» harvo i tuvieron un prejudisio grande kontra los Latino Amerikanos. 5 anyos despues vino la «Epidemia EBOLA» i los desendientes Afrikanos fueron estigmatizados.
«Nancy Messonnier» del Centro del Control de Epidemias disho «No se deve kreer ke porke uno es de desendensia Asiátika ke tiene el muevo Coronavirus»
Pero es mas facil dizirlo ke azerlo. En toda la istoriara los grupos al bodre de la sosiedad los akuzaron del mal ke avia en la sosiedad. Ultimamente, a los Musulmanos, refujiados o imigrantes, tratandolos komo grupos desvalorizados. Vate al sinema para ver a los kavzos los mas malos komo los Rusos, Chinezos i Iranianos, sientistas lokos i milioneros torturados. En los anyos 1950 i 1960 eran los Komunistos i Homosexuales ke eran los malos. Hitler echo la kulpa a los Judios despues de la Depresion, segida por la Gerra Grande. Lo mas estranyo aki es ke los Estados Unidos saviendo lo ke se azia a los Judios, resivieron solamente a 10% de los refujiados fuyendo de la Alemanya Nazista. En el Departamento del Estado avia mas Antisemitismo i se kreia ke los Judios eran espiones de Hitler i ke mankavan de moral. Kuando se mete una etiketa sovre los grupos etnikos i de nasionalidades se krea un mundo de «Eyos kontra Mosotros». En lugar de «Mosotros». «El tiempo vino de meter fin al espanto de los ke paresen ser diferentes i ke avlan i se komportan de otra manera.»
«Vale mas no meter benzina sovre el fuego ke tiene su etiketa.»
Trezladado por Simon Geron
Fuente: Ladinokomunita
