eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LA OSE I LAS KRIATURAS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra en 2012, el martes 3 de janvier, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
Oy me pensi de avlarvos de una ovra ke va fyestar en 2012 sus 100 anyos de vida, i ke djugo un rolo muy importante durante la gerra i salvo de la muerte a miles de kriaturas djudiyas de Fransya, kyero avlar de la OSE, Œuvre de secours aux enfants (ovra de salvasyon de kriaturas).
En vedra, komo ya lo entenditesh si se fyestan sus 100 anyos, la OSE no empeso durante la gerra, ni mismo la primera. No empeso en Fransya, i su eskopo al orijen no era de okuparse de kriaturas para salvarles la vida . En vedra, la OSE empeso en 1912, komo vos dishe, no en Fransya ama en Rusiya, en la sivdad de Saint-Petersburg.
Fue fundada por un militar , un avokato i un mediko, kon el nombre ruso de Obhetsvo Zdravookranenya yevreiskavo Naseleniye Rosiyi, organizasyon sanitarya de las povlasyones djudiyas proves, mas kurto Obshetsvo Zdravookranenya Yevreyev, organization sanitarya de djudyos, o OZE. En 1912, estamos dainda antes de la primera gerra i de la revolusyon bolshevika, ama despues de terrivles pogromes i basho un tsar. La povlasyon djudiya de Rusiya es de sinko milyones, asigun el kuento echo en 1897.
El eskopo de la OZE es de permeter una buena ijyena ande los djudyos rusos proves para ke no kaygan hazinos, i, por siguro, de kurar los ke ya son hazinos.
Vyene la gerra en 1914, la revolusyon en 1917, la gerra sivil en 1918. Si la povlasyon rusa sufre muncho de estas desgrasyas, kale dizir ke los djudyos mas muncho. Seriya menester de una emisyon entera para kontar todo el lavoro de la OZE para okuparse de la povlasyon djudiya, i de sus kriaturas. Ama no tengo tyempo de apesgarme sovre toda esta larga istorya, syendo ke kyero konsagrar mi emisyon de oy a la parte ke djugo la OZE en Fransya durante la sigunda gerra. Solo kyero ambezarvos komo, de una ovra sanitarya rusa, la Oze vino a ser una ovra franseza de salvasyon de kriaturas de una muerte prometida i asigurada por los governos alman i franses.
Tomando mas i mas importansya, la OZE rusa se aze internasyonala i en 1923, en Berlin, basho la prezidensya de Albert Einstein, es fundada la Union de las sosyedades para la proteksyon de la salud de las povlasyones djudiyas. Agora la OZE se yama OSE, Organisatio sanitaris ebraica. Hitler vinyendo en Berlin en 1933, la OSE se va de Berlin para Paris en 1935.
La Fransya, pais adelantado, paresiya no tener menester de una ovra sanitarya djudiya, salvo ke ayegan por miles en Fransya los refujyados djudyos de Almanya. La OSE se yama agora Œuvre de Secours aux Enfants (ovra de salvasyon de las kriaturas) sin saver kuanto este nombre va ser meresido pokos anyos mas despues, kon la venida de los Almanes en Fransya, no los refujyados, ama la Gestapo, i un governo franses amigo i ayudante de la Gestapo.
La OSE fragua o merka o alkila kazas, hanes para arresivir las kriaturas djudiyas fuyendo Almanya, i Austria despues del Anschlus de 1938. Kuando empesa la gerra, la OSE ya se okupa de 1.600 kriaturas en kuatro i despues onze ogares. Van a ser 25 a la Liberasyon, ama dainda no estamos en esto.
Lo ke vos vo kontar agora, lo travi de un lavoro de la Senyora Katy Hazan, ke topi en el sityo internet de la OSE.
Al empesijo de la gerra en 1939, las poveretas de kriaturas refujyadas almanas i austriakas se topan ser « sivdadinas de paizes enemigos de la Fransya » i tyenen menester del abrigo de la OSE. Despues kale abrigar las kriaturas de los bombardamyentos i los refujyados kuando los Almanes entran en Fransya en 1940.
Las kriaturas, a la venida de los Almanes, son yevadas en la zona sur, las mas chikas en tres kastiyos ke ya tyene la OSE en el departamento de la Creuse. Los mas grandes se van un poko mas tadre, los ultimos el 10 de junyo 1940 son yevados a pye para fuir la yegada de los Almanes.
Una parte de la direksyon de la OSE se instala en la zona Sur, en Vichy i despues Montpellier, i la otra parte se keda en Paris. A poko a poko su aksyon se va azer mas i mas a eskondidas, i su ovra sanitarya se va trokar en ovra de rezistansya para salvar a las kriaturas de la deportasyon.
La OSE se topa inkluida en la organizasyon yamada UGIF (Union Jenerala de los Israelitos de Fransya) ama topa sekanoza la manera de la UGIF de arrekojer en sentros ofisyales a las kriaturas de la zona okupada. A la rovez, despues del aferramyento de masa del Vel’ d’Hiv’ (16 de julyo 1942) el orden del profesor Eugène Minkowski, en karga para la OSE de las kriaturas de la zona okupada, es : « Salvaremos a las kriaturas espartyendolas ».
Son 230, medikos, assistantes sosyalas, edukadores, lo mas djudyos alzasyanos (savyendo ke la OSE no tyene mas derecho de emplear djente ajena). La direksyon se va de Montpellier i kuando los Italyanos despues de novyembre 1942 okupan el sur-este de la Fransya, se va en Chambery basho los Italyanos. Ya vos dishe munchas vezes aki ke los Italyanos no solo no aziyan danyo a los djudyos, ma ensima los protejavan kontra la polisiya franseza .
Munchos medikos sin lavoro desde las leyes rasistas se meten al servisyo de la OSE. Tambyen kale dizir ke la OSE va ser ayudada por munchos scoutes djudyos, los EI. Se okupan, por siguro, de kurar, ama tambyen de mantener i dar de komer a los djudyos refujyados, ama tambyen a los djudyos internados, sea ke van ofisyalmente a kurarlos, sea ke se azen maksus detener para estar kon eyos, en los kampos de Gurs i de Rivesaltes.
En novyembre 1942, los Almanes entran en la zona sur, i la menasa de deportasyon kaye tambyen sovre los djudyos fransezes.
En 1943, la OSE avre sentros en Chambery, Grenoble, Megève, ande estan los Italyanos. Aki avro una muy chika paranteza para dizir ke yo tambyen me topava en Megève en 1943, ama kon mis padre i madre i no kon la OSE, yo teniya este mazal de tener mis padre i madre para guadrarme.
Lo mas yuch es de aprovar de azer salir a las kriaturas de los kampos ande se topan aferradas. I por esto, munchas vezes kale obtener la otorizasyon de los jenitores, ke, poveretos, no entyenden todos ke guadrar a sus kriaturas kon eyos es kondenarlos a muerte. I despues, por siguro, kale obtener la otorizasyon de las otoridades fransezas – no kale olvidar ke los kampos son kampos fransezes guadrados por la polisiya franseza – para salir la kriatura del kampo.
Las kriaturas son embiyadas en 14 kazas espartidas en Fransya, o fiyadas a otras organizasyones, kristyanas o djudiyas. Entre estas 14 kazas ay la tristemente famoza kaza de Izieu, famoza porke la Gestado va aferrar i deportar todas las kriaturas de Izieu i sus maestros. Vos akodro ke el kapo de la Gestapo de Lyon, Klaus Barbie, ke dyo el orden de aferrar a las kriaturas, va ser el mismo aferrado munchos anyos despues de la gerra en Bolivia, ande se eskondiya kon el nombre de Klaus Altman, i va ser djusgado en Fransya, i eskapar su vida en prezo.
Ama guay de la polisiya franseza. En agosto 1942 , los djandarmas fransezes vyenen en syertas de estas kazas aferrar a unos mansevikos djudyos ajenos para yevarlos, las manos atadas kon fyerro, al kampo de Rivesaltes de ande aviyan sido travados legalmente. Son los ordenes del governo fransez de Pierre Laval, para « arreunir las famiyas »…Unas kuantas kriaturas son travadas i eskondidas por los de la OSE ama malorozamente los otros son deportados kon sus jenitores. La OSE aprova de eskonder lo mas posivle de kriaturas ande kazalinos de la povlasyon franseza.
Entremyentres los Amerikanos (Quakers, Joint, American Friends Service Committee) toman kriaturas para los Estados Unidos. Yene kriaturas son salidas del kampo de Rivesaltes. Los ke son lo mas en sekana son los mansevikos de mas de 15 anyos. Asigun lo akodros entre el governo franses i la Gestapo, yamados akodros Oberg-Bousquet, la polisiya franseza aprometyo de bushkar i aferrar a los djudyos ajenos afillu en la zona sur, dicha libera. Ama no libera para los djudyos. El 1 de septyembre 1942, la djandarmeriya vyene a aferrar 33 mansevikos ajenos en dos syentros de la OSE. 11 se pueden salvar, los otros no. En todo, aferran a 200 kriaturas . 70 pudyeron sido travadas, 134 fueron deportadas.
Kale saver ke, asigun los akodros, las kriaturas solas no eran aferradas ; ama kon los paryentes, si. Kaliya dunke travar estas kriaturas de sus paryentes kuando estos dezmazalados eran aferrados. En la noche dicha de Venissieux, el 26 de agosto 1942, 108 kriaturas pudyeron ser travadas de sus poveretos de paryentes i salvadas de la deportasyon grasyas a ovras djudiyas i tambyen kristyanas. Fueron 12.608 los djudyos aferrados por la polisiya franseza en la zone dicha libera i deportadas.
Oberg, aferrado despues de la gerra i kondenado a muerte por un Tribunal franses, a sido grasyado i liberado. En kuanto a Bousquet, el ke aviya pasado los akodros kriminales kon Oberg en nombre del governo franses, era kombidado a komer munchas vezes por su amigo Mitterrand, Prezidente de la Republika, asta ke un kristyano lo mate el 8 de junyo 1993, unos 50 anyos despues de estos akodros kon la Gestapo.
Ama a parte de lo ke dishe , las kazas de la OSE no fueron atakadas ni por los fransezes ni por los almanes, salvo tres kazas inkluyendo la de Izieu. Esto dicho, la OZE entyende la sekana de deshar las kriaturas en kazas konosidas de la polisiya, i aprova de serrarlas una detras de otra, eskondyendo las kriaturas ande kristyanos, kon el ayudo de Mgr Salièges, arkiovispo de Toulouse i Mgr Théas, ovispo de Montauban.
Los kapos de la OSE, organizan ekipos kargados de azer falsos papeles, kon el ayudo de los scoutes djudyos. Otros ekipos son kargados de yevar a las kriaturas en sekreto de un punto a un otro. Son munchas vezes mansevikas ke no son muncho mas aedadas de los ke estan protejando. De vez en kuando una es aferrada. Kale todo eskonder, i eskonderse a si mismo.
Charlotte Helman, una de estas, es en primero aferrada por los rezistantes ke la toman, por modo de su aksento alzasyano, por una de la Gestapo i kyeren fuziyarla. Es el mayor del kazal ke la va salvar, konosyendo a los djudyos de los luales Charlotte se okupava. Despues es aferrada por la Milice (los fransezes alyados de los Almanes) i embiyada en la prezo de Limoges. Aya se aze arrankar en la infirmeriya de la prezo dos dyentes sanas, i kon esto se puede fuir de la prezo. Es yene aferrada por la Gestapo en la estasyon de Toulouse, i yene se puede fuir. Va yevar a djudyos verso la frontera de Espanya, i despues irse kon la armada ingleza asta Bergen Belsen ande se va kedar asta 1947 komo veluntarya para ayudar a los refujyados.
Esto es la istorya de una en medyo de tantas otras.
En kavzo ke sean todos aferrados, los kapos de la OSE embiyan a Geneve, de manera sekreta, los nombres de kada kriatura i ande esta eskondida, para ke se sepa, a la Liberasyon, ande toparla.
En marso 1944, todos se eskonden i las kazas son serradas. En dos dias, 100 kriaturas de una kaza son eskondidos ande kazalinos o ande rezistantes, los papeles son kemados i la puerta enklavada.
Agora el lavoro es de aprovar de embiyar lo mas muncho posivle de kriaturas en Suisa o en en vezes en Espanya. Georges Loinger, uno de los kapos de la OSE, obtyene el ayudo del mayor de Annemasse, sivdad franseza a la frontera de la Suisa, ke se okupa de topar los pasadores i una organizasyon se aze, i ansina son 1.100 kriaturas ke pueden pasar en Suisa.
En todo, fueron miles i miles de kriaturas ke fueron salvados de la muerte por la OSE.
Despues de la Liberasyon empesa una otra istorya, ke a sido kontada en un filmo de Richard Dembo, intitolado La maison de Nina (la kaza de Nina) : es la istorya de estas kazas de la OSE ke arresivyeron despues de la gerra a tantas kriaturas uerfanas ke saliyan de kampos o ke aviyan sido eskondidas. Entre tantas kriaturas ke se toparon en estas kazas la mas famoza se izo Elie Wiesel, premyo Nobel de la Paz, ama fueron tantos otros tambyen ke pasaron por la OSE, ke reusho de azer de eyos ombres.
Aki tambyen seriya menester de una emisyon entera sovre el lavoro de la OSE despues de la gerra.
Esto dicho, la OSE ke a guadrado su nombre de Œuvre de Secours aux enfants , se okupa mas, agora, de las personas aedadas i hazinas, de Alzheimer por egzemplo. Un lavoro de un siglo, empesado en la Rusiya de los tsares, i ke se kontinua oy en el mundo entero.
Vidas largas ke tenga la OSE ; lo merese.
Al djueves ke vyene, si kyere el Dyo !
Edmond Cohen
