Las Notas de Matilda – Kuentos Populares: "LOS EXEMPLOS DE LOS RABINOS" – Exemplo 34

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER

Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986

EXEMPLO 34

Ambezaron muestros maestros: Se konta ke Rabí Tsadok, kuando fue yevado prizionero a Roma, lo merkó una sierta matrona i le mandó una ermoza sierva.
Apenas la vido él se aboltó a la pared, se asentó i pasó la noche entera estudiando.
A la demanyana sigiente la sierva fue a kesharse a su patrona i le disho: «Mijor valía murir ke ser entregada a este ombre».
La matron lo mandó a yamar i le disho: «Porké no izites kon esta mujer komo uzan los ombres?»
El le respondió: «Yo sé de famiya noble, apartengo a la stirpe de los mas altos saserdotes. Me dishi: – Si vo a eya, puedo meter al mundo bastadros».
Kuando eya sintió sus palavras, dio orden ke lo desharan ir libre kon grande onor.

Fuente foto rabino: UCL LIBRARY