eSefarad Noticias del Mundo Sefaradi
Solusión final
Avía un karnesero ke le vino un chiko grano en el dedo «eskrivano» i se fue ande un doktor. El doktor lo kuró, el dedo le amahó i él estava muy agradesido.
Un día vino el doktor a la butika i le demandó komo estava.
«Muy bien!» le disho el karnesero, «Munchas grasias!»
Le disho el doktor: «Me azes un plazer?»
«Siguro!» le disho el karnesero.
«Mira, a mi mujer le agrada la lekierda kortada en tajadas muy delgadas. Me la puedes kortar?»
«Komo no!» le disho el karnesero i se la kortó en tajadas delgadikas.
Después de tres días vino el doktor, le disho: «Komo stas? Komo está el dedo?…
Mira, mi mujer kere un kilo de karne para biftekes, ke se la kortes a tajas delgadikas, delgadikas…»
«Bashustoné!» disho el karnesero i se la kortó.
Pasaron otros tres días, vino de muevo el doktor i le disho: «Ke ermozo ke te amahó el dedo! Mira, a mi mujer le agrada el ígado kortado en tajadas muy muy delgadas…»
«Ya entendí!» le disho el karnesero i se lo kortó komo kería la mujer.
Pasó una semana i el karnesero está mirando por la vitrina de la butika ke el doktor se está dirijendo ande él.
Metió la mano derecha sovre el mármol del banko, tomó la baltá i kon un golpe seko se kortó la mano.
Kuando entró el doktor, le dio la mano i le disho: «Tómala i aze tú lo ke keres!»
Kontado por MATILDA KOEN-SARANO – 2016
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
