eSefarad Noticias del Mundo Sefaradi
Ver todos los artículos de esta sección
Moshe Ha’Elion
por Albert Israel
Moshe nasyo en 1925, en Salonik, ijo bohor de Eliyahu i Rahel Ha’Elion. Dospues de anyo i medyo nasyo su ermanika chika Ester (Nina). En 6/4/1941 atako la arma almana a gresya i entreval de un mez la okupo entera. En estos dias su padre, Eliyahu, muryo de puntada. Los Almanes aplikaron sus angusyas kontra los djudyos gradualmente, paso detras de paso. Emprimero serraron, emidyatamente, las gazetas i las eskolas djudias. En junio 1942 arekojyeron a los djusyos de saloniki, entre la edad 18-45, en la «plaza de libertad» i los mandaron a lazdrar en kampos de lavoros duros. En desembre 1942 destruyeron el semitaryo djudyo entero. En el empesijo de 1943 divizaron a los djudyos en 5 getos, los forsaron a metersen el sinyo amariyo en la yaka del vistido, kitaron a todos los ijikos djudios de las eskolas i empesaron los transportos. En 15 marso 1943 salyo el primer transporto de treno de Salonik a Auschwitz kon 3000 djudios (100 personas en kada vagon), de la istasyon Baron Hirsh, al lado del geto Baron Hirsh. En sigiente, los djudios de los otros getos se transferaron emprimero a geto Hirsh i de aya se «enkargaron» a los trenos.
Moshe i su famiya fueron transportados en 7/4/1943. Dospues de 6 dias ayegaron a Auschwitz i pasaron la primera seleksyon. Toda la famiya, aparte de Moshe i su tiyo, fueron eskoijidos a sus muertes. A Moshe lo metyeron a lavoros duros (kavakar kanales). En poko tyempo se firio i paso «operasyon» (la operasyon era ke le rompyeron el gueso de la kavesa kon martio). Ayi konosyo a un papaz polanezo ke se keriya ambezar la lingua grego. Kada ves ke Moshe le ambezava la lingua el papaz le dava una kozika chika de komer. Este aranjamyento kon el papaz kontinuo anyo entero.
Un dia se apanyo letreandose kon una konosida prizyonera. Lo kondanaron a 25 palos de haftona i lo pasaron a echo mas duro.
Moshe paso otras 3 seleksyones i fue salvado de los krimatoryos. Ma a los kavos estava muy desfuersado. En 1945 lo kitaron a dos «marshas de muerte». Malgrado ke no tenia fuersas parvino a salir de estas marshas bivo. Moshe dize ke esto fue un miraklo. En 7/5/1945 arivaron los amrikanos i Moshe se libero. Estava hazino de dizanterya i auflado entero de la ambiertura.
En 1946 desido de emigrar a Israel. Dospues de unos kuantos mezes de apronto en Italya (ke aya konosyo a su mujer Hana) partyo a Israel kon la nave «Wedgwood». Los inglezes dominaron la nave i prezyonaror a los emigrantes en el prezo de Atlit.
Solo en 17/6/1946 los prizonyeros fueron libarados i los yesurines de Moshe i Hana fueron terminados.
Moshe sirvyo 23 anyos en la arma Israelyana (Tsahal) i 20 anyos en el ministeryo de defensya. Entre 1970 i 2015 (45 anyos) estuvo volontaryo en organizasyones ke ayudavan a los sovrebivyentes del holokosto. Asta el anyo 2016 era miembro en la direksyon de Yad Vashem i en la direksyon del azilo Rekanati.
Moshe Ha’Elion eskrivyo munchos livros. Entre eyos livros en Ladino. El livro «Metsarey Sheol» (Los estrechos de inferno), ke mensyona su pasado en el holokosto, salyo en hebreo, Ladino i Inglez. El livro «Mahanot Hamavet» (Kampos de muerte) es livro de poizias en ladino i en Ebreo. En este livro se topa la poema suya «La djovenika al lager» eskrita i dedikada a su ermana Nina, kompozada de parte de el:
/p>
Abasho puedesh ver las palavras de esta poema.
Moshe, endjuntos kon Avner Perets, Traduizaron tambien los livros «Iliada» i «Odisea» a ladino.
Moshe esta kon mozotros. Le auguramoz vidas largas i sanedad Buena. El ken entyende Hebreo puede ver el filmo muevo i muy enteresante a su vida «El Ombre ke torno de ayi»:
La djovenika al lager – Moshe Ha’Elion
A mi ermana Nina ke bestiyas muy enflamas
Al lager kuando vino la ardieron en las flamas
La linda djovenika, ijika muy kerida,
Ke sus parientes todo le davan en su vida.
Kon seda la vestian, yevava djoyas d’oro,
La alondjavan siempre de males i de yoro.
Su kaveyura blonda al ombro abashava,
En banyo de parfumes el puerpo se lavava.
Sus manos delikadas en agua no metia,
Brodando o meldando, ansi pasava el dia.
O bien kon sus amigas a pasear se iya,
En kampos o en guertas, i flores akojia.
Un dia los Almanes del nido l’arrankaron,
I kon su padre i madre al lager la yevaron.
Sesh dias i sesh noches, estuvieron enserrados,
Adientro de vagones, eskuros i siyados.
Mas de ochenta ombres, mujeres, kriaturas,
Tratados komo perros, pasavan oras duras.
A la stasion finala despues ke s’abasharon,
Al grupo de mansevas de ir le ordonaron.
Desho a sus parientes, se fue sin separarse,
Segura ke fin poko ya van a enkontrarse.
Ma kuando a Birkenau, el kampo de la muerte
Entro, d’un punto al otro, se le troko la suerte.
Sin entender del todo lo ke s’esta pasando,
Deznuda ‘sta al banyo, la ‘stan dezenfektando.
No tiene mas kaveyos, no le desharon nada,
Aparte de kundurias i djuba envarada.
La gritan, la aharvan, a kada paso i paso,
Su nombre es agora el numero al braso.
Es ke s’esta sonyando? Es ke esta despierta?
La aferro el espanto, su alma se alerta.
En viendo las barieras, los postos, los soldados,
Kon armas en sus manos i perros a sus lados,
Savia ke su vida no es mas lo ke era,
Se destruyo su mundo, es una prizoniera.
La noche kaye preta, ‘stan tres en una kama,
Se siente desgrasiada. Si ‘stava aki su mama!
La povre no savia, lo ambezo mas tadre,
Ke dizde el primo dia kedo sin padre i madre.
I entendio estonses de ke se espandia
Un guezmo de asado de noche i de dia.
I sin kedar un punto, de kuatro chimeneas,
Suvia al sielo fumo i flamas kon senteas.
Pasaron siete dias, la meten en komando,
En otro blok del kampo agora ‘sta morando.
A penas amanese, gritando Aufstehen,
Kon palos, kon rempushos – afin ke s’adjileen –
Las echan de las kamas. Un chay, i a la kaye.
Appel! Es maloroza ken tadra, ken se kaye.
Las yevan al lavoro. Se deve ir al paso,
Al son de la orkestra, sin menear un braso.
Lavora kon la pala, kavaka kon la chapa,
S’aboka, s’alevanta, el dia no s’eskapa!
Se le tuersio la spalda de tanto esforsarse,
De lenya la estanyan, si oza apozarse.
Aparte d’una supa i d’una revanada
De pan, el dia entero, no mete en boka nada.
Ansi de ora en ora, de dia en semana,
S’aflaka, se konsume, se aze muzelmana.
Su puerpo, antes fino i yeno de supleza,
Parese komo muerto. Ken save kuanto peza!
Los dias se suksiden, la vida es muy dura,
Su korason ‘sta triste i yeno d’amargura.
Ma non un solo punto, le sale de sus mientes,
Ke muerte temeroza toparon sus parientes.
I kaje kada noche estando a la kama,
Se kuvre la kavesa, los yora i esklama:
A Dio, Sinyor del Mundo! Dio tanto poderozo!
Te rogo, en Gan-Eden, ke durman en repozo.
En vezes a la kama, djuzgando su estado,
Al avenir medita, i a lo sentensiado.
Es ke la sufriensa devenira tan fuerte,
Ke no le kedara mas ke de bushkar la muerte?
Se ferira el puerpo. Se kedara echada.
Se fuyira del rango. Ensultara soldada.
Ansi, seguramente, arrivara su torno,
De le tomar la vida, de la echar al forno.
O es ke la esperansa ke va venir el dia,
Ke metera un kavo a esta trajedia,
La azera mas fuerte i muy mas dechidida,
De garrear la gerra i a kedar en vida?
Salvarse del inferno, avra mijor de esto?
Ma solo ke no tadre, o Dio! Ke venga presto!
Medita? O se sonya? Esta en otra sfera,
Los ojos se l’aserran. Se durme. Ke l’aspera?
De muevo amanese. Gritando Aufstehen
Kon palos, kon rempushos – afin ke s’adjileen –
Las echan de las kamas. Un chay, i a la kaye.
Appel! Es maloroza ken tadra, ken se kaye.
Eksplikasiones
Lager – kampo de konsentrasion
Komando – grupo de lavoro
Aufstehen – Alevantarse!
Appel – adjunia para examinar la prezensia
Muzelman/a – muy flako/a, kuero i guesos, a penas bive
