eSefarad Noticias del Mundo Sefaradi
2 semanas antes Israel izo el mas grande yerro stratejiko en achetando de arestar la gerra kontra el Hezbollah sovre la presyon del prezidente Biden, el kual mira de deshar una buena fama pasifista en la istorya moderna. El a traverso su delegado djudyo Amos Hochstein menaso a Binyamin Natanyahu de kortar el entegro de armas i de no protejar Israel en el Konsilyo de Seguridad de las NU, en no uzando su veto en kavzo de una rezolusyon mala kontra El, si refuzava la tregua. Ademas Biden, el ramay insistyo a ke la tregua sea de 60 diyas i no mas kurta, kon el buto de deshar una erensya mala a Donald Trump.
Israel en 2 mezes de gerra elimino en grande partida la fuerza de la organizasyon terrorista i mas del 50% de su armamiento fue destruyido. En un kurto tiempo la armada Israeliana estava en kamino de destruyir en totalidad todos los túneles i las reservas de armamiento sofistikado del Hezbollah en el sud del rio Litani. Koza ke permetiya a los moradores del norte de Israel a retornar sin espanto a sus moradas i a sus vidas normal de antes.
Supito, grasias a ke Israel aflako el Hezbollah i a la supreza jeneral del mundo entero, los islamistos protejados por la Turkiya ke se ajuntaron kon otras organizasyones revolusyonaryas nasyonalas sirianas fueron kapaches en un muy kurto tiempo a konkistar la Siriya oksidentala i sin gerreyar a okupar la kapitala Damas. Koza ke enkanto a todos los aktores etranjeros enbabukados en la politika interna de Bashar el Assad el kual fue ovligado de fuyirse kon un avyon ruso a la Rusia. La Rusia,el Iran amigos de Bashar lo desharon kayer visto ke eyos no están mas en kapachitad de ayudarlo. Los ortos aktores tal la Turkiya miro i mira de empidir a ke los kurdes sirianos no se ajunten kon los del Irak i establisen en el 40 % de la de la Siria un estado independiente inimigo ke mirara de konkestar en el sud de la Turkiya las sivdades a mayoriya kurdas.
Vinyendo a Israel, el tomo kon urjensa sus prekosyones a okupar la partida del monte Hermon en mano de la Siria, i de okupar Kunetra la sivdad ke era un tiempo la kapitala del Golan. Ademas establisyo una linya de defensa en el territoryo Siriano en la zona tampon kon el apoyo de los otoktones arabos sunnitos i de los druzes de la rejyon ke fueron ayudados por Israel durante toda la peryoda de gerra. Los druzes sirianos siendo paryentes de los druzes israelianos eyos no permetyeron a ke fuersas islamistas se establisen al bodre de la frontera israeliana. Ademas Israel profitando de la okazyon kontinua a bombardar kada noche todos los depos i las fabrikas de armamiento i de gas danjorozo, por ke no kere ke estos armamientos kaygan en mano de los islamistos. Sin peryer la okazyon la avyasyon israeliana deroka los dalkavos sityos del Hezbollah i del Iran en Siria.
Kualo Trump organizara para ke la pas torne al Medyo Oriente no se save porke el sinyor es inprevisible, ma en todo kavzo mas de los arabos vizinos de la Siria no ay un interés en el mundo i espesialamente en el oksidente sovre el despues de la gerra en Siria. Eske una republika islamista fondamantalista al model del Al Kaida nasera? Eske la Siria será divizada en kantones independientes en los kualos las diferentes tendensyas politiko/relijiozas rejiran sus puevlos? Sin una mueva surpreza, es muy demprano de previzar el futuro de la Siria. Ma una koza es seguro, la inimista kontra Israel no trokara, malgrado ke los shefes de los grupos politikos no izyeron fin agora dinguna deklarasyon mala kontra Israel. Ma komo se save la taktika yamada ‘takiye’ es siempre empleyada en la politika araba. Sovre las eskrituryas relijiozas muzulmanas ke dizen ke si un muzulmano se topa en ora apretada o de menaza de muerte el puede inyegar ke es muzulmano. Sin duvda en estos momentos en topándose en estrechura los revolusyonaryos sirianos miran de estar en buenas kon Israel, ma ken garantisera ke una vez eyos en los anyos vinideros sintiendosen fuertes militarmente no lo atakaran? En todo kavzo, los fondamantalistos relijiozos sean sunnitos komo shiitos, sovre la influensa de las doktrinas de los Ermanos Muzulmanos, no keren bien a los djudyos i sus butos es de destruyir Israel.
No devemos de olvidar ke el rejimen de los mollah en Iran no abokaran kaveza kon fasilidad a la desfetcha ke enkontran en la Siria i en el Libano i achetaran de repentirsen de destruyir Israel. Sin duvda eyos kon pasensya malgrado la inimista, miraran de metersen de akordo kon los muevos dirijentes sirianos en apuyandolos a atakar Israel. Esto kere dizir aparejarmos en el futuro a una kuatrena gerra kontra el Libano o la Siria.
Selim Salti
Fuente: BÜLTEN de los turkanos de Israel – turkisrael.org.il
