eSefarad Noticias del Mundo Sefaradi
Anton Pavlovich Chehov, nasyo en Rusia en el anyo 1860. Un eskritor realisto, empeso a eskrivir kuando era estudyante de medisina. Teniya un stilo de eskrivir los ke meldavan sus livros lo yamavan (el stilo de Chehov)
Muryo en Almanya en 1904 a los 44 anyos de tüberküloz.
El lavoro komo mediko ma syempre diziya:
“la medisina es mi mujer i la literatura es mı amante”
Un chiko pasaje de su famozo livro THE COWARD
Un dia enviti a mi sala de estudyo a la profesora ke les da lisyon a mis ijos i le dishe:
-Julia Vasilievna asenta i serraremos el kuento de las lisyones ke les dates a mis ijos …aviamos kedado dakordo a 30 rubles no?
– No sinyor kuarenta
-No trenta esto muy siguro porke yo syempre pago trenta rubles a las profesoras. Alora ya izo dos mezes ke vinites
-Dos mezes i sinko diyas sinyor
-No djusto dos mezes i esto le aze 60 rubles. solo deves de kitar los diyas de alhad porke no izitesh lisyon salitesh a kaminar
Julia Vasiyevna de los inyervos se izo kolorada ma no kito boz Chehov kontinuo
– 9 diyas de alhad le aze 12 rubles, 4 diyas mi ija estava hazina no izitesh lisyon, 3 diyas estavas kon dolor de muela mi mujer te dyo permisyon ke te repozes, esto le aze 19 rubles
A Julia se le incho los ojos de lagrimas ma no kito boz
Ayer rompites una kupa ke era antika de mi nono i por esto te va kortar 2 rubles, oy mi ija suvyo al arvole i se le arazgo la bluza esto es tu kulpa no izites atansyon i por esto te v akortar 5 rubles
En pasada te di 10 rubles
-No sinyor el no medyo, su mujer me dyo 3 rubles
-Komo no! siguro ke te di, aaa kita i 3 rubles de mi mujer alora lo ke te kedo 11 rubles
Julia kon las lagrimas en los ojos
-Bueno sinyor
Le di los 11 rubles los tomo sin kitar boz kon las manos titireando i me disho:
-Mersi sinyor
-Mersi??? De kualo mersi
-Por las paras ke me dyo sinyor
-Tu ya saves muy byen ke te enganyi, o mi Dyo! Komo de persona sos, no vites ke te rovi i me estas dizyendo mersi por esta endjustisya!!
-Por lo poko ke me dyo mersi, porke ande lavorava antes de el no me dyo ni esto
-No te dyeron ni esto? No me sorprendi… oyeme te kije azer una chika shakaika para ke tomes lisyon. No te merikiyes te va pagar tu derecho, toma este anvelop aryento ay djusto 80 rubles, solo no entyendo deke no te revoltates a esta endjustisya, no mesto kreyendo ke en el mundo puede aver este karar de personas espantahozas, no es posivle
-Ya es posivle sinyor.
Le demandi pardon por esta lisyon muy kruela eya de muevo me disho “mersi” avryo la puerta i se fue.
Estava triste, dishe de mi para mi:
EN ESTE MUNDO KE KOLAY ES ENGANYAR A LOS POVERETOS.
Forti BAROKAS
Fuente: turkisrael.org.il
