eSefarad Noticias del Mundo Sefaradi
En Kahir de Ayfto moravan dos mansevikos, Moris i Salim.
Los dos eran amigos de chikez, moravan serka uno del otro, ambezavan en mizmas eskolas, halis amigos kon amista i kolaborasion. La diferensia entre las dos famiyas era entendida, i no kavzo dingun danyo a sus relasiones.
Moris era de famiya djudiya, i Salim era de famiya muslimana. Las dos famiyas ayudavan una a la otra, i aviya respekto i onor entre eyas.
Al anyo 1956 se rumpio todo. Empeso la gerra de Suets, i Israel partisipio kon los Englezes i los Fransezes, kontra el Ayfto, sovre el Kanal de Suets. El prezidente del Ayfto, Gamal Abdul Nasar, kito un orden, ke los djudios de Ayfto deven de salir de la tierra de Ayfto en una semana, kon una valija i poka moneda.
Esto fue ekspulsion terible, sin ke aviya bastante tiempo a vender los bienes, las butikas, i kompaniyas. Moris demando ayudo de su amigo Salim, ke su padre era komandante de la polisiya al derredor ke moravan. Su padre les disho ke puede aserar ojo una semana, no mas. Salim le prometyo a Moris ke va vender la kaza de Moris, i va guadrar las paras para Moris. Aviya konfiyensia rezya entre los amigos. se espartieron kon abrasos i lagrimas.
Moris se adelanto en Israel, i se izo ofisier reushido en el rejimento de intelijensia, kon ayudo de la savidura de la lingua araba, ke saviya bueno. Teniya de meldar letras, sintir konversasyones, i sekretos del enemigo.
Al anyo 1973 empeso la gerra de Yom Kipur, ke mos aferro kon supriza, i no estuvimos prontos, munchos askeres de Ayfto i de Israel murieron, i munchos eran kaptivos en los dos paezes.
Un diya de la gerra, lo yamaron a Moris, al hospital de Beer-Sheva para interogar un ofisier ayfsiano kaptivo i ferido. Este ofisier era miembro de grupo de parashutistos ke entraron aryentro de Israel para atakar la armada de Israel de atras, para kavzar defikultades a la organizasion de atakar la evasion Ayfsiana.
Moris entro al ospital en Beer-Sheva i bushko el ferido ke deve interrogar. Lo topo en el sigundo etaje, i delantre de la puerta, dos beklejis israelianos de la polisiya militara kon tofekes en las manos. Moris entro a la kamareta, i enfrente de el su amigo ayfsiano, Salim, kon un tubo de infusion en el braso, ama en eta buena. Moris se enkontro kon su amigo de la chikes kon supriza i sonriza…
A… disho Moris, Amigos-Enemigos.
Naturalamente, Moris desho esta investigasion, i avlo kon su komandante, diziendo ke no puede investigar a un amigo de su chikez. El komandante lo entendio i lo kito.
Moris abraso a su amigo-enemigo, i le konto ke serkamente va aver trokamiento de kaptivos, i va atornar a su kaza.
Pasaron anyos i vino la paz entre Israel i Ayfto, i muchos israelyanos vijitaron Ayfto komo turistos, entre eyos Moris.
Moris se enkontro kon su amigo Salim, se abrasaron komo amigos, kon amista ke kedo rezya de estonses de la chikez. Salim le dio a Moris las paras de la kaza ke vendio kon buen presio.
Se espartieron kon bendisiones ke se van a enkontrar mas vezes al avenir, solo amigos sin enemigos, para siempre.
Nissim Ashkenazi
Kiryat Motskin
Israel.
