eSefarad Noticias del Mundo Sefaradi
En una epoka byen oskura 740 kriaturas kedaron abandonados en medyo de las olas i el mundo serro sus puertas, todos dizyendo “NO”
Solo un ombre disho “Sİ”.
En el anyo 1942 el mundo achakes de la gerra estava en un fuego . Un vaporiko avansava avagar avagar, pedrido en la mar de India. No teniyan ni un puerto para abashar ni esperansa de topar.
Aryento de este vaporiko aviya kaji 740 kriaturas kansados, sin padres i sin madres.
Estas kriaturas eran de Polonya, fuyeron de los kampos sovyetikos deshando detras no solo sus tyerras, desharon sus madres sus padres i sus famiyas. Enprimero pasaron a İran, kreyendo ke ya desharon la muerte detras i van a bivir libres. Ma se rankontraron kon una verdad muncho mas amarga.
“no es muestra responsabilitad, andavos a otro kamino”.
El tyempo estava pasando, de komer no les kedo, kuras no teniyan sovretodo esperansa deltodo.
Maria, una ijika de dodje anyos tenyendo la mano de su ermaniko le vino al tino las palavras de su madre la ora ke se estavan despartyendo
“ten tino de tu ermaniko protejalo”.
En Guajarat, avia un chiko palasyo. En este chiko palasyo biviya un rey nombrado JAN SAHİB DİGVİJAY SİNGHİJİ. No era un grande İmparator, no posedava muncha rikeza i no teniya poder. Los ke le ayudavan le dyeron haber i le disheron:
“En el porto ay 740 kriaturas fuidos de la Rusia, dingunos no los keren, mezmo los İnglezes los refuzaron”
“kuantas kriaturas”?
“740 sinyor”
Dospues de pensar unos kuantos minutos
“ke vengan”
“sinyor los İnglezes pueden kontrolar i dospues…”
“los İnglezes pueden kontrolar mis puertos ma no pueden kontrolar mi konsensya, de vista ke vengan”
En el anyo 1942 en el mez Ogusto el vaporiko arivo al porto i las kriaturas empesaron a abashar a unos a unos.
El imparator los aresivyo vistido de blanko, los miro kon kerensya i les disho:
“de agora endelantre no sosh guerfanos yo so vuestro padre”
En un mundo ke la gerra destruyo el mundo, el rey no los abandono, los vistyo , los meldo, les fyesto sus aniversaryos, el no fue un rey fue un padre para eyos.
Kuando eskapo la gerra ya vino la ora de espartir. Munchas vezes, las espartisyones son mas tristes de los adios.
Los anyos pasaron akeas kriaturas se engrandesyeron, ken salyo doktor, ken profesora i ken se izo padre i madre.
Oy en dia en Polonya ay kalejas i eskolas a su nombre. Kuando el mundo serro las puertas un ombre les avyo su puerta i les disho “yo so vuestro padre”.
Mas ke no ayga gerra, las madres ke no yoren, dinguna kriatura ke no kede sin padre, porke las kriaturas son inosentes i dingunos no les demandaron si keren vinir al mundo. “NUNKA MAS”.
FORTI BAROKAS
Fuente: turkisrael.org.il
