eSefarad Noticias del Mundo Sefaradi
El numero 64 de la revista istórika Erensia Sefardi va salir en dos semanas kon 14 fotografyas i los artikulos sigientes:
• 1506 – Matasinas en Lisbona
• 1789 – Karta de los muestros a l’Assemblea Nasional Fransesa
• Personajes Sefardís importantes:
– Garcia de Orta, mediko, naturalista i farmakolojista en Goa
• Las kantigas de mi Nona
• El mundo Sefardí, Salonika, Paris, Nova York
• Revistas de Livros:
– Actas del Simposio Internacional Santangel 98
– Neue Romania Judenspanisch XI
Editorial
L’atake de los terroristos en la sivdad de Bombay (Mumbai), India, konfronte otra vez el mundo sivilizado kon lo malo de los asesinos islamistos i sus amigos en el mundo. Lo ke es espesialmente trajiko en estas matasinas sin buto de suidadinos de todas religiones es la tortura de las viktimas Judiyas antes de sus eksekusiones, solo porke eran Djudiyos.
Esto fue verifikado por los ekspertos forensikos Israelis ke vieron los kadaveres.
Komo las kamaretas de tortura de la Inkisisyon espanyola i los kampos de eksterminasyon de los Alemanes, los asesinos Islamistos apuntan a los Djudiyos.
Este odio por los Djudiyos no es sorprezo por kavsa del anti-Semitismo general ke se topa en los paeses Arabes i Musulmanes i en la Evropa Oksidental.
La prensa, televisyon i radio están ayundando a este muevo anti-Semitismo, ke viena esta vez de la izkierda, en yamando los terroristos de lo ke son en lugar de emplear palavras komo ‘militantes’ o ‘aktivistos’. Esto no ayuda el mundo sivilizado en su lukha por la eradikasyon del terrorismo i perpetua el prejuisyo de la prensa contra Israel i los Djudiyos.
Dr. Albert de Vidas
Editor de Erensia Sefardi
erensia@aol.com
Fuente: enviado por el Dr. Albert de Vidas a Ladinokomunita
