'Vijita de Alhad' Un enkontro de "Sefardi Federation of Palm Beach County".

Vos kero kontar ke el diya 10 de oktuvre tuvimos la primer ‘Vijita de Alhad’ de el anyo 2010-2011 de muestra organizasion «Sefardi Federation of Palm Beach County».

Mos adjuntimos komo setenta personas en la Kehila ‘Sharei Shalom’ de Boynton Beach.

Tuvimos para artista invitado  Orit Rehany, nasida en Iraq, ke moro en Israel unos kuantos anyos, i despues imigro a Canada i agora mora en Florida, ke mos konto por el uzo de ‘Nochada de Henna’  la noche antes de la boda komo era el uzo en Iraq en famiyas Judias (i es dainda el uzo en famiyas de Mizrahim en Montreal, Canada).
 
Fue muy interesante i informativa i tambien mos amostro un filmo de la Nochada de Henna ke izieron en Montreal resientemiente por la boda de la ija de su ermano.  Yo no saviya ni ke avia una kehila Espanyola/Portugesa en Montreal, i mos konto ke es la mas vieja kehila Judia en Canada komo la kehila Espanyola/Portugesa en Nueva York.

Despues mos asentimos a tomar kave, dulsurias de los muestros, i echar lashon kon amigos i amigas ke no mos vimos de munchos mezes. Fue una tardrada muy espesial i amistoza.

Esperamos kon mucha alegria ke vamos a tener mas de estos enkontros en los mezes ke vienen.

La proksima okazion va ser el enkontro de ‘Echar Lashon’ al Mierkoles, Octobre 27 en el Temple Sharei Shalom en Boynton Beach.  En esta okazion vamos a tener a Elias Barrocas ke mos va kontar por la Hagada de Pesah de Sarajevo (por seguro en Ladino).  Vamos a tener en primero un ‘Box Lunch’ Sefardi… borekas, guevo haminado, azetunas, kezos, i biskocho pronto para almorzar antes de el enkontro.

Vos kero informar tambien ke las klasas de ‘Viva Ladino’ ya empesaron en el mismo foro – Temple Sharei Shalom en Boynton Beach. Despues de la reushida ke tuvimos el anyo pasado, agora estan kontinuando las klasas

Kon mucha amistad i karinio,

Daisy Alalouf Newell
Boynton Beach, Florida

Para más informasion eskrivir a eSefarad