eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos kontara en esta seksion sovre “Uzos i Kostumbres de los Sefaradís en Turkia”, ande mos va a avlar sovre el siklo de vida empesando por el kazamiento i todo lo ke esta atado a este evenimiento: ashugar, banyo de novia, ketuba i mas…i despues paridura, fashadura… i ansi asta la fin de la vida. Komo lo dize el refran: “De la fasha a la mortaja” (de la faja a la mortaja).
LA KETUBA
La ketuba, ke segun la tradision djudia es el kontrato ke inkluye las ovligasiones del marido enverso su mujer, inkluzo todos sus menesteres i sus derechos konjugales, es uno de los faktores integrales mas antiguos en la seremonia nupsiala.
Una referensia a estas ovligasiones ya es mensionada en el livro Exodo, (kapitolo 21 versikolos 10 i 11) aun ke no se trata, propriamente dicho, de una ketuba sino ke de los derechos ke tiene la mujer en kavzo de un kazamiento del marido kon una segunda mujer.
Dokumentos eskritos en arameo sovre pargamino, ke datan de al deredor de los anyos 440 antes de muestra era, demostran klaramente kuanto se kudiava por asegurar los interesos de la mujer. En estos dokumentos es inkluida tambien la suma de moneda ke el novio pago al padre de la novia ansi ke la suma del kosto del ashugar de la novia. En desparte de esto el nombre de la novia era mensionado en la ketuba komo eredera de todos los bienes en kavzo de muerte de su marido.
El modelo aktual de este kontrato de kazamiento fue fiksado en la Edad Media. De mizmo ke oy, todas las ketubot medievalas fueron sinyadas, en desparte del novio, por dos otros testigos. En su livro «Medieval Ketubot from Sefarad» el Prof. Jose Luis Lacave trae, en desparte de dokumentos i fotokopias eskritas en arameo i en letras ebreas kuadradas, fotokopias de algunas ketubot medievalas.
Aki una version kastiliana de una ketuba de Trijueque, serka de Toledo, ke empesa kon las palavras:
«En el sinken dia de la semana, 22 Tishre, anyo 5234 de la kreasion del mundo, aki en Trijueque, es saver komo el novio, Raui Joseph, ijo de Raui Abraham, su fin sea para bien, ke es mediko, disho a Simha, ija de Sen Tof, seas a mi por mujer segun la ley de Moshe i Israel, te servire, onorare i te abastesere todos tus menesteres i entrare en ti segun el uzo de la toda la tierra i te dare 200 maravedis de plata ke te apartendran. I la novia Simha aksepto de ser su mujer.»
Segun lo puedemos ver de este teksto las ketubot de oy no son muy diferentes de las ketubot medievales ke datan de mas de 500 anyos atras.
Uno de los uzos mas populares de los djudios de Espanya ke trusheron kon si a los paizes en los kualos se aresentaron despues de la ekspulsion fue el de la dekorasion de las ketubot. Se supoza ke estos djudios tornaron a dekorar las ketubot una o dos jenerasiones despues de sus ekspulsion o sea a los prinsipios del siglo 16. De ketubot ke yegaron asta muestros dias, de los siglos 17,18 i 19 puedemos embezar ke eyas eran dekoradas kon motivos simples i asta motivos komplikados i multikolores. Sentros para la dekorasion de ketubot fueron kreados en Amsterdam i Venezia ma sin duda ke los mas grandes sentros fueron kreados ne las sivdades del Imperio Otomano komo Estambol, Izmir, Saloniko, Bursa, Edirne, i otras mas.
