Uzos i kostumbres de Pesah por Elias Barrocas

El uzo de los djudios de la norte de Afrika de pasar el plato del seder o keara de Pesah ensima de las kavesas de kada uno ke estan en la fiesta es por modo de proteksion. Asigun siertos rabinos i mekubalim, la noche de Pesah es una nochada
de proteksion para los bene Israel por modo ke eskaparon los behorim de la muerte sino tambien por modo ke ay una konstelasion en los sielos en favor de los ke salirian de la servidumbre de Ayifto.

Por modo de esta proteksion es ke pasan el plato por ensima de las kavesas.

Los djudios ejipsianos tienen el uzo de uzar kalsados espesiales o sandalas la noche de Pesah i uzan un baston en demando:

¿De ande vienes?
_De Mitzrayim
¿ i ande te vas?
– A Yerushalayim.

Los sefaradis otomanos no tenemos este uzo. Los sefaradis teniyan la kostumbre de merkar kalsados muevos para Pesah, en asignifikando ke estamos prestos a salir al dizierto. ( En Rosh Hashana se merkavan chapeos muevos).

En Pesah el ijo bohor o el mas chiko era el ke tomava ensima del ombro el bogo
de la matza durante la meldadura de la Hagada i si era el behor a el le apertenesiya el guevo del plato del seder. Este era el uzo ke vide en mi kaza.

Mi padre, ke en ganeden este, teniya el uzo de guadrar un pedaso de la matza del afikomin ariento del livro de Pesah durante todo el anyo, despues meldi ke era un uzo de guadrar esta maza  i algunos guadravan tambien del haroset para endulkos i otras kurasiones ke aziyan al tiempo.

Me akodro ke antes de Pesah era uzo de enkalar las kazas i de trokar las perdes (kortinas) i meter tapetes de moed enriva de las kamas.

Una de las kostumbres de Pesah de los sefaradis, ke se pedrio, era el de trayer a kaza en el ochavo diya la «prasinagua», ke eran yervas de ojas largas en sinyalando ke ya pasimos la mar kolorada (Yam Suf), la entrada del enverano i dezeyando ke la kaza este yena de parnasa i aslaha komo las yervas de loskampos. Le yamavan prasinagua por modo ke eras largas i komo la forma de las ojas de prasa. Yo i mi ermanika eramos okupados de yenar la kaza de estas yervas.
¿Dalguno se akodra de este uzo?

En muchas kazas sefaradis no era uzo de komer kodrero las dos noches de Pesah
por modo ke es ovligasion de kemar lo ke kedo (el kusur) despues de pasar la media noche. En mi kaza mi padre kemava el korban ke se metia en el plato del
seder.

Los sefaradim de Turkiya no uzamos de komer arroz en Pesah por modo de pudo kayer hames arientro, ama mi tiyo me konto ke en la gerra el haham bashi permitio de komer arroz en seguida de gizarlo, kon la kondision de ke el kusur fuera kitado
de la kaza presto.

En mi chikez los djudios no lavoravan la semana entera de Pesah i aviya una dicha de : Ken no se kome el kapital en Pesah, no sale de hova.

Pesah alegre a todos.
Elias Barokas.
Miami
Para Ladinokomunita