eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos kontara en esta seksion sovre “Uzos i Kostumbres de los Sefaradís en Turkia”, ande mos va a avlar sovre el siklo de vida empesando por el kazamiento i todo lo ke esta atado a este evenimiento: ashugar, banyo de novia, ketuba i mas…i despues paridura, fashadura… i ansi asta la fin de la vida. Komo lo dize el refran: “De la fasha a la mortaja” (de la faja a la mortaja).
EL PRENYADO I LA KORTADURA DE FASHADURA
Esta vez trataremos de dos otros evenimientos muy importantes en la vida del djoven par i el sirkolo familiar:
La boda ya paso, todos ya se kalmaron i agora lo ke asperan, la esfuegra en primer lugar, i los otros miembros de la famiya es de oyir ke la rezin kazada ya esta prenyada.
Siendo ke unos 70, 80 anyos atras, ainda munchas famiyas bivian en kortijos i maales, ke eran komo un chiko «geto»‘ todos savian lo ke giza la vizina, oyian los pletos, i el vizindado era una parte integrala de las alegrias, de dias tristes, i de la vida diaria de kada famiya i famiya. Se puede dizir ke de una sierta manera esta era una muy grande famiya, ke las noches se despartian para ir a durmir, kada uno en su kaza. Ma no solo, mizmo los ke ya moravan en apartamentos partisipavan a todos los evenimientos familiales, los unos de los otros.
Kuando en ora buena, ya se anunsiava del prenyado de la djoven mujer, naturalmente ke la alegria era grande, ma este era tambien un evenimiento de grande importansia por dos razones:
En primer lugar porke la novia no era steril i en segundo lugar era la esperansa ke nasera un ijo de buena ventura ke kontinuara la dinastia de la famiya.
Del momento ke se dizia ke esta prenyada, la futura madre era entornada por la famiya ke la kudyavan i se preokuapavan por su salud. Naturalmente ke su madre i esfuegra eran la primeras a tomar kudyo de eya. Le aprontavan komidas espesialas i miravan a kumplir todos sus dezeos.
El refran dize «le dezeo a la prenyada inyeve tostada» ke demostra muy bien ke dezeos tan difisil a kumplir puede tener la mujer prenyada. En el kuatren o sinken mez del prenyado, se azia una seremonia en la kuala se kortava la primera kamizika del bebe. La kortadura de fashadura tenia lugar kuando una era primeriza. A esta seremonia eran envitadas, las mujeres serkanas de la famiya ansi ke amigas i vizinas. En Turkia, oy dia se uza kortar la fashadura, aun ke simbolikamente, siendo ke en muestros dias de mizmo ke en munchos otros paizes del mundo, todos los menesteres del rezin nasido/nasida se enkomendan en uno de los grandes magazenes para bebes.
Una de las mujeres de la famiya o una pariente o amiga, ke era kazada, tenia kreaturas i padre i madre en vida, era onorada a echar tijera o sea a kortar la primera kamizika del bebe. Durante la seremonia se uza a echar sovre la ropa bonbones todo en augurando a la prenyada «eskapamiento Bueno, parto kolay (fasil) o parida de ijo».
En Salonik i paizes de la Trakya se uzava a kortar otruna kamizika yamada kamizika larga komo simbolo para una vida larga i buena. Si el rezin nasido era ijo le vistian esta kamizika el dia del Brit Mila. Si era ijika se la vistian en el dia del fadamiento. Segun ya lo vimos en los diversos evenimientos, aki tambien se mobilizavan las mujeres de la famiya para kuzir, brodar i trikotar i aprontar la fashadura asta el sieten mez del prenyado, de miedo de un parto prematurado. Los sefaradis de Izmir uzavan a kuzir otruna fasha espesiala, aprontada kon ropas de seda i kadife (velur) brodada kon ilos de oro, plata i seda, ke se aregalava a uno de los Sifrei Tora en el kal.
