Una Adaptasíon “Otomanizada”: El kapitan korajozo por Elia Karmona (Istanbul, 1910) por Marina Mayorsky

English version >>

Introduksíon:

Elia Refael Karmona (1869-1931) era el mas fekundo autor en la istorya moderna de Ladino. El publiko al menos 55 romansos i el tambien fondo i direjo El Jugeton, un jurnal umoristiko donde algunas de sus ovbras literariasaparesieron.

Mozos temenos munchos imformasiones sovre la vida de Karmona del autobiografia ke el publiko en 1925. Ayi, el konto sovre su famiya, ke estava respektada i rika, ama, en su chikez, kuando Karmona era ninio, la famiya kaeya en mizerya. Su padre se devino un biyetaji, impyegado de la kompanya del tranvay. Karmona estaba estudiando en la eskola de Alliance en su kuartier, ama kuando el tenia kinze anios, su padre lo kito de la eskola para ke el puede lavorar I ayudar su famiya. El tenia impiegos diferentes – komo un professor de Franzes, afilu ke el mizmo no sabia Fransez bien, komo un imprimidor, komo un vendedor de papeles i kibrites. En fin kuando el estava dezesperado i averguensado, el aprovo de ofisio del autor, ama no avia el mizmo ke tuvo esta idea; avia su madre ke lo es sujero i ke lo dava los primeros kosejas.

Uno de los mas interesantes ovras del autor i mi preferado romanso es El kapitan korajozo, publikado en 1910. Es una adaptasíon del romanso popular Fransez Le Comte de Monte Cristo por Aleksander Dumas (1844). Empresetandose la fabula del famozo romanso Fransez, Karmona lo transformo a un romanso istoriko sovre los ultimos anyos del reino del sultan Abdul Hamid II i la revolusíon de los Jun Turkes en 1908. El protagonista es un marinero Grego nombrado Georgy ke es akuzado de ser un revolusionario i aprezado en una prizíon terrivle en Siria. Ansi, el romanso presenta no solo una istorya de amor i traisíon, ke eran los fondasíones de akeos melodramas sentimentales, ama tambien sujetos politikos – el despotizmo del Sultan, el afrito de los sivdadanos Otomanos, i la esperansa de la Revolusíon. Un kuriozo aspekto es la mankansa de Judiyos: adpatando su version i plantandolo en el Imperio Otomano, Karmona izo las protagonistas Gregos i Armenos, personas ke apartenesen a otras minorías Otomanos, i un ombre Fransez komo el primero malazedor.

Komo se puede ver, el romanso mostra un profundo interés en polítika i istorya Otomana.

Kapitolo 1

La istorya ke vos vo empesar a kontar se paso en Kostan el Alhad 14 Desembro 1902. Apenas el dia amanesio, ke el era klaro i ermozo, el sol kaentava komo se fuera un dia de enverano i muncha jente salian ala kaye, sin yevar palto mizmo.

En la ancha plasa del Taksim, muncho ruido se vea desde la manyana. Partikularmente delantre la grande iglisia se vea munchos personas entrar i salir kon presteza, sudando i trasudando. Se alguno se aparava dela puerta de esta kaza de orasion, puedia muy bien atinar un grande dekoro ayi adientro. Rikos tapetes eran ranjados en basho, guarnidos de ermozos vazos de flores pozados al bodre delas paredes. Adientro, el lugar entero era ensendido i todos los objetos santos, de plata i de oro ke esta iglisia poseda, eran parados en sus lugares respektivos.

Delantre la puerta, personas a muchedumbre esperavan en pies i kada kuatro de ora ke pasava los kuriozos ivan pujando.

Ke avia oy en este lugar ke tanto bruido se azea a su deredor?

En este dia se iva selebrar en este santo lugar le seremonia del kazamiento del Kapitan Georgy, ijo de un guertelano, kon la gasioza seniorita Emilia Lavroniades, ija de un bankiero muy afamado de nuestra siudad.
Mas de todos los rikos kazamientos, este ultimo azea rekojer munchos kuriozos por la sola razon ke esta boda traea un grande enkantamiento a toda la komunidad Grega.

La seniorita Emilia era la ija regalada del bankiero ke deshemos ariva. Engrandesida kon una serioza instruksion i en regalo sin igual, eya era de una rara ermozura. Aedada de serka vinte anios, Emilia era un poko yena, teniendo una figura redonda, una kaveyadura poko blonda i unos ojos donde la mirada kavakava el korason del mas serio ombre. Engrandesida enel sentro de las grandes famiyas rikas de Arnavutköy, la ija del bankiero fue demandada por novia de parte munchos mansevos teniendo altos postos, kualos en banka i kualos en komiserio, i siempre la ermoza seniorita refuzava la mano, respondiendo ke eya se iva kazar kon akel mansevo ke le iva plazer. Ke fuera riko o prove, poko le importava.

Los ruidos salidos en plasa del despozorio dela grasioza Emilia i el kapitan Georgy azea meter en grande enkanto toda la populasion. El Kapitan Georgy no era prove, el tenia una buena pozision ma era el ijo del guertelano del padre de Emilia.

I komo Sr. Lavroniades atorgava a tomar por yenro al ijo del su propio guertelano? La seniorita Emilia tambien era muy instruida, komo refuzava la mano de tantos ermozos mansevos, por espozarse kon uno ke se tuvo engrandesido en su kaza por karidad? Es esto loke azea mas muncho atirar la kuriozidad de todo el puevlo, i kuanto mas tadre se azea mas la muchedumbre de jente pozava en la puerta de la iglisia.

El kazamiento devia tener lugar alas oras kuatro i desde las oras dos los numerozos invitados ya empesavan a venir i los bankos dela iglisia eran yenos. Alas oras tres i media, un djesto de apretamiento se empeso a ver entre la populasion, kada uno dezia a su kompaniero: Ya viene! Ya viene! La novia ya viene! Todos ronchavan sus miradas sovre la punta dela kaleja. Un ermozo lando traea la grasioza novia, vestida de blanko, teniendo a su lado estierdo a su kerido padre. 37 karosas vienen detras del lando, entre las kuales de vea una donde un mansevo, vestido de un esmokin preto i un chapeo chilindro, desendia i enderechando sus guantes blankos, entrava ala iglisia akompaniado de su padre. Todos miravan en la kara de este joven ke no era otro ke el Kapitan Georgy. El kaminava de un tono orgoliozo i saludava kon una dulse sonriza todos los amigos ke el enkontrava.

Mientras ke adientro dela kaza de orasion se aparejavan a dar la bendision, una karosa de gala se detenia delantre de la puerta. Tres ombres vestidos en sivil i teniendo el aire de hafiyés desendian i se dirijan adientro. Pokos segundos despues, una karosa mas ordinaria traea a un komisario kon dos adjentes de polisia. Eyos tambien desendian i entravan kon akeos hadras ke nuestros lektores ya konosieron en tiempo del despotismo.

Es justo enel momento onde el kapo pretre se levantava por dar la bendision ke el komisario kon sus kompanieros entran. Eyos se aderesan al kapo pretre i le demandan:

“El kapitan Georgy ken es?”
“Yo so,” respondio el novio.
“Vos sosh el Kapitan Georgy? El novio ke va kzazar oy?”
“Djustamente, Senior.”
“A nombre dela ley sosh arrestado.”
“Arrestado?! Yo? Por kualo? No tengo ningun dar i aver kon la polisia.”
“No sosh vos el primer kapitan del vapor Grego Sofia?”
“Si, Senior.”’
“Vos azesh el viaje de Marseya a Kostan siempre.”
“Parfektamente.”
“I bien, vos sosh akuzado de traer kartas sekretos delos Jun Turk de Paris a akeos de Kostan.”
“Ma, Senior, es una kalumnia.”
“No es mi echo, Senior Kapitan, es delantre de mi kapo ke mostraresh kuento.”
“Ma, senior, yo esto kazando oy, vos puedo dar una buena fiansa ke manyana vo ir onde me yaman.”
“Es imposible, Senior, vos sosh akuzado de revolusionario i devesh segir aponto mis pasos, una karosa vos espera en la puerta.”

El rayo no oviere tan fuertemente ferido komo esta novidad feria toda asistensia. Kada uno se mordia el musho. Senior Lavroniades bushkava a defender su yerno, ma todo era en vano. El Kapitan era arrestado. Akompaniado delos adjentes de polisia, lo kitavan de la iglisia, deshando enel dezespero a todos sus parientes i invitados, i partikularmente a Emilia ke, kon el grito, “Ah! Georgy!” kaya en basho i se dezmayava.

Fuente: Marina Mayorsky