eSefarad Noticias del Mundo Sefaradi
El chiko Djoha era un ijiko yaramaz. Kuando afitava kualker modo de malisiya en el kazal, savian todos ke probavlemente Djoha era kulpavle. Un dia, su madre sintiyo ke un Haham grande iva vijitar el kazal, i ke el siempre reushia dar la disiplina a kriaturas mal portadas. Ansi fue ke eya le demando (al haham) si podia avlar kon el chiko Djoha.
El Haham acheto de avlar kon el, ama disho, kero avlar kon el solo. Entonses la madre lo embio a Djoha al Kal a avlar kon el Haham solo.
El Haham, un ombre grande kon una boz muy huerte, lo asento a Djoha i le demando kon seriozidad, “Ijo, tu saves ande esta el Dio?”
El chiko Djoha avrio la boka, ama no disho nada, kedo asentado kon los ojos muy aviertos i su boka muy avierta. Estonses, el Haham le demando demuevo, kon boz mas alta i un tono mas seriozo, “Ande esta el Dio?”
Una otra vez, Djoha no dio repuesta.
Estonses el Haham, kon boz mas fuerte i amenasando kon su dedo en la kara de Djoha, le demando demuevo, “Ande esta el Dio”?
El chiko Djoha echó un grito i en supito salio de ande el Haham, korio a su kaza, entro en el kloset i asero la puerta. Kuando su madre lo topo en el kloset, le demando, “Djoha, kualo afito”?
El chiko Djoha le arespondio kon un gran temor,, “Esta vez, esto en una problema muy grande. El Dio se desparesyo, i me estan echando la kulpa a mi.»
—
Nissim Elnecave
NY
Fuente: Ladinokomunita
