Tresera "Tadrada de Enverano" de la Federasyon sefaradi de Palm Beach

Alhad 21 de agosto a la tadre tuvimos la tresera «Tadrada de Enverano» de la Federasyon sefaradi de Palm Beach en la Florida.

Este es el emkontro ke mas reushita tuvimos, mas de 300 personas i algunas malorozamente kedaron de asentarse en basho o estar en pies. No tuvimos mas lugar komo podresh mirar en las fotos.

Emprezentimos en primero el filmo «Salonika , City of Silence» (Salonika, Sivdad de Kayades). Este fue muestro omenaje a los desparesidos de Saloniki, Rodas, Cos , Sarajevo, Monastir i otras muchas komunidades sefaradis durante la Shoa. Esta semana son las komemorasiones en Israel i en la Argentina.

Un filmo esmoviente i muy enteresante de la vida djudia ke aviya en esta sivdad membrada «Sivdad Madre en Israel» o «La Republika Djudia» , ande una vez moraron 80,000 djudios. Las gerras Balkanikas, el fuego de 1917 i despues la okupasion nazista desharon apenas 2,000 sovrebivientes.Una sivdad yena de jurnales en varias linguas, grandes estudiozos de Tora i de Talmud i una vida intelektuala grande.

Vinieron a mirar este filmo muchos ijos de selaniklis i de Yanina ke no konosiyamos i ke kedaron kon gran impresion de konoser la estoriya de ande vinieron sus djenitores.

Kero reengrasiar publikamente al Diriktor del filmo el Sinyor Maurice Amaraggti por azer este magnifiko filmo ke es una memorya estorika de gran valuotosida para las jenerasiones en vinientes en seguito de su amabilitad de enbiarmos su permision para emprezentar el filmo. Kol Hakavod.

Afilu ke ize una prezentasion antes del filmo, al kavo se izieron muchas demandas departe de los asistentes ke kreigo kedaron kon ganas de empreguntar mas i les aprometi ke vamos a perkurar de azer un enkontro para avlar enteramente por el Olokosto sefaradi .

No deshi de remarkar ke el aktual estado de muestra lingua la mayor parte es achakes de esto, pedrimos el 80% de los ke avlavan el Ladino en sus moradas i a la kalejas.

El sigundo filmo fue mas alegre «Joe Elias» Un grande truvador del Ladino. i uno de los ke emprensipio a kantar en Ladino en los Estados Unidos. Malorozamente pedrimos a Joe el 10 de avril del 2010 despues de aver dedikado a 30 anyos de su vida a kantar autentika muzika sefaradi i kompilar/arrekojer diezenas de kantes en la kaza de aedados de Coney Island ansina komo en Evropa i Israel.

Su alma esto siguro ke estuvo ayer kon mozotros .El publiko sintio ke estavamos en un konsierto en vivo i dio palmas para kada kantika. Riyeron mucho kon la kantika de «Sara la preta» i espesialamente kuando demando kuantos entendiyan el Ladino. En el salon muchos alevantaron las manos i riyeron mucho kuando disho Mashala!.

Mersy muncho a Daniel Elias su ijo ke tambien kanta i tanye el klarinet. i por tu permiso, bendisiones i enkorajamiento ke mos enbiyates para kontinuar la ovra de la Kultura djudia. Muestras bendisiones para ti i tu famiya. Nunka olvidaremos la eredad ke Joe mos desho.

Aki vos enbiyo algunas fotos ke travimos grasias a la kortesiya de la kerida Miriam Eli.

Kontinuamos frutshiguando kon el Ladino i la kultura sefarafi en Florida.

Sanos i rezios ke estesh.

Elias Barokas.
Miami.
Para LadinoKomunita