Tres shakas sovre Einstein

 

• La vista (la kara) de Einstein era tan bien konosida, ke ande iva, la djente s’aserkavan a demandarle: «Dame a entender esta teoria [de relatividad]  tuya.» Finalmente el sinyor Einstein ya se enfastio de esto, i empeso a dizir, a todo el ke le demandava la mizma koza: «a todos les parese ke yo se Albert Einstein.» – Rachel Amado Bortnick, Dallas, Texas, USA

 

• Einstein tenia un shofor (chauffeur, driver) ke por anyos no solo ke se lo yevava ande tenia ke ir i dar konferensias, ma entrava a las konferensias a sintirlo a su mestro. Finalmente un dia, Einstein le disho al shofor: «Tu ya sintites mis konferensias miliuna vez, kreygo ke agora ya saves de kavesa [de memoria] todo lo ke va dizir. A la proksima ves kero ke tu te vistas kon mis vestidos, i te metas peruka de kaveyos komo los miyos, i salgas tu a dar la konferensia. Yo me vo vistir kon el vistido tuyo i la kasketa, me vo azer del shofor, i me vo asentarme por atras.»
  I izieron esto. Verdad ke el shofor estava avlando tan djusto, i tan bueno, i eksplikando todo tan klaro, ke mezmo Einstein («el shofor») kedo maraviyado. Despues uvo demandas de la audiensa, i esto el shofor estava respondiendo perfektamente, asta ke uno le demando una koza ke el no savia la repuesta. Entonses, kon grande otoridad disho: «Ha! esta pregunta es tan simple, ke mezmo el shofor mio te puede responder!» I apunto a Einstein asentado por atras en la audiensa. . Rachel Amado Bortnick, Dallas, Texas, USA

 

• Un gazetero le demando a Einstein: – ‘Me puedes dar a entender la Ley de la Relatividad?’ Einstein le respondyo: – ‘Me puedes dar a entender komo se friye un guevo?’ El gazetero lo mira enkantado (sorprendido) y le respondyo: – ‘Por siguro ke lo puedo’. A lo kual Einstein respondyo: – ‘Bueno, estonses azelo, ama imajinando ke yo no se lo ke es un guevo, ni una sarten, ni la azete, ni el fuego’. – Edmond Cohen, Paris, Fransya

 

Fuente: Ladinokomunita