eSefarad Noticias del Mundo Sefaradi
Este alhad eskapo el 16en Festival de Filmos Djudios de Miami.
Este anyo se amostraron 26 filmos, entre eyos amostraron tres kon tema sefaradi, dos referados a la tema de la Shoa i el otro a la tema del folklor de los sefaradis marokanos.
El primer filmo fue Besa, la promesa (Besa: The Promise) en lingua albanesa kon subtitolos en ingles. Este filmo trata de kuando los nazistas okuparon la Albanya i fueron eskondidos por los musulmanos albaneses. Se amostran varias entrevistas a reskapados de la Albanya, todos kon alkunyas sefaradis, uno de eyos avlando en kastiyano mesklado kon j.e.. La estoriya sentrala es una famiya de alkunya Aladjem refujiada de Vidin (Bulgaria) ke es eskondida por un pastisero i hodja . Esta famiya kuando partieon de la Albanya le desho al hodja tres livros de Moadim para ke se los guadrara. (Los mesmos ke le dio mi aguelo a mi padre kuando partio de la Turkiya, empremidos de la empremeriya Shlesinger de Vienna en 1923 i ke los trushe kon mi). Al kavo de la gerra, la Albanya se izo uno de los mas aserrados payises komunistas, afilu de no deshar ni entrar letras de ahuera del payis. El hodja antes de murir le desho sava al ijo ke los guadrara estos livro ke son de la famiya Aladhem. Despues de una grande bushkida el ijo los topa al ijo i inyeto en Israel ……..Lo mas kuriozo de este filmo es ke en dingun momento se mensyona el biervo sefaradi.
El filmo israeli Mi ermoza ermana (Ahoti HaYaffa,- en ingles My Lovely Sister), es en ebreo i en arabo-marokano. Es un filmo inchido de superstisyones i elementos majikos. ke kontinuan egzistiendo en chikos lugares del Israel aktual. La tema sentrala es el pleto de una ermana ke se aravia kon la otra por kavza de ke se kazo kon un arabo (algo ke akontese en otros payises oy diya, ama en Israel esto es kaji traisyon a la nasyon). Esta ermana se muere de la tristeza i es enterrada ahuera del bedahayim enfrente de la madre. Konversasyones entre la mujer, la madre i la ermana muerta azen el prinsipal sujeto del filmo. Un filmo dramatiko achetable, ama nada komparable al filmo Sh’hur kon Gila Almagor i Avi Toledano de aze unos anyos atras.
El treser filmo. ke estuve mas de sesh mezes asperandolo. se titola La tresera metad («The Third Half»). Linguas makedonian, almana, bulgaro i ladino kon subtitolos en ingles. Filmado en la aktuala Republika de Makedonia. El filmo se developa en Makedonia despues de la okupasyon almana. Trata sovre la estorya reala de Neta (Klara) Koen. La famiya Koen avla enteramente kon las membros de la famiya i amistades en ladino (kale dar kavod al diriktor Darko Mitrevski kor respetar la estorya i amostrar en el filmo de ande vinieron los sefaradis a los Balkanes). El filmo se pasa en la parte sentrala en un partido de futbol entre el ekipo makedonio entrenado por un djudio alman i el ekipo de los okupantes almanes i bulgaros. Klara Koen se enamora de uno de los djugadores makedonios no djudios ke la eskonde mientras los bulgaros se yevan a todos los djudios a los trenos . A la fin del filmo sale la vedradera Klara de 96 anyos kon una muy grande famiya de ijos , inyetos i bisinyetos, amostrando la kontenuedad de esta famiya aki en los Estados Unidos. Uno de los inyetos, ke agora mora en Mexiko estuvo en la sinema esta noche.
Lo enteresante es ke a este filmo incheron la sinema serka de 200 makedonianos de los Estados Unidos, todos muy elegantemente vistidos (Vedra ke solo aviyamos dos sefaradis i muy pokos djudios).
El diriktor espliko ke por vengansa de este filmo, el governo bulgaro se opozo a la entrada de Makedonia en la ultima reunyion de la Union Evropea….
Un magnifiko filmo ke kale no pedrer. El diriktor disho ke en poko tiempo estara el filmo en DVD para la vendita en los Estados Unidos.
Agora, si kere el Dio, asperamos en serka el Festivalo de filmos de Israel.
Salud i vidas buenas.
Elias Barokas – Miami
Para Ladinokomunita
