eSefarad Noticias del Mundo Sefaradi
Durante de el anyo entero yo vos konto de las okaziones de ‘Vijita de Alhad’ o ‘Echar Lashon’ ke muestro grupo tiene en los mezes de Octobre asta Mayo.
Kuando fue el ultimo enkontro de «Echar Lashon’ en el mez pasado, Elia Barocas estava muy triste…ke, no mos vamos a enkontrar asta Septembre, Octobre? Entonses, pensimos i pensimos ke la verda es ke ay muchos de mosotros ke mos kedamos aki en Florida el anyo entero…i no viajamos al Nord para vijitar famiya o pasar los mezes kayentes.
Yo, komo vo a la biblioteka en Delray Beach para los enkontros de Musika Folkloriko Internasional, pensi ke ayi puedemos uzar la oda onde puedemos amostrar filmos. Ay mucho tiempo ke Elias kere amostrar filmos i tener un ‘Sephardic Film Festival’ i esto ke seya una chika egzemplo.
Ansina nasio la idea de tener una «Tadrada de Enverano» una vez al mez en Alhad onde vamos amostras filmos de interes Sefardi.
Esto va ser en la bibliotek de Delray Beach, Hagen Ranch Road Library.
El primer enkontro va ser al 19 de Junio a las 1:30 i el filmo va ser ‘El Ultimo Sefaradi’. Despuez del filmo va aver diskution kon Elias Barocas, ke es bien savido en la istoria de los Sefardis i tiene muchos filmos para amostrar.
El segundo enkontro va ser al 17 de Julio a las 1:30 i los filmos van a ser ‘Arvoles Yoran por Luvia’ de muestra kerida Rachel Amado Bortnick,el filmo ‘Ojadas de una Vida Sefaradi’ de Daisy Alalouf Newell, i el filmo de la famosa Flory Jagoda, ‘La Yave de Espanya’.
Pensamos ke muchos van a kerer venir no solo para ver los filmos, i tener kontakto kon sefaradis, durante el enverano,ama tambien para ir a un restaurant despuez a komer komidas konosidas…ke va ser el restaurant ‘Rodos’ en Boynton Beach, komidas gregas i mediterreanas.
Los ke moran en el sud de Florida i keren venir, pueden telefonar a Daisy – 561-964-5141…para tener una idea de kuantos van a venir i aparejar las sias.
Esperamos ke este proyekto va reushir…i pensamos de kontinuarlo por el anyo entero, si vemos ke ay enteresados. No ay de pagar…debaldes….si keren dar una kontibusion a la puerta, sera apresiado. La bibliotek no mos kovro por el uzo de sus oda..i es una oportunida de uzarla.
Daisy Newell
