eSefarad Noticias del Mundo Sefaradi
Munchas vezes, en avlando kon amigos de Estambol, de Edirne o de Salonik siempre mos viene el sujeto «de ande para ande los izmirlis tomaron el biervo «Chapines» por dizir los «Kalsados» o «Sapatos»?»
Yo, komo desendiente de izmirlis ke se, estuve todos estos diyas bushkando informasyones sovre este biervo tan úniko de Izmir.
Antes de todo, kale dizir ke «Chapim» es un biervo de orijin portugeza, i komo savemos, «Smyrna» komo se dizia al tiempo, hue una de las sivdades turkas ande la komunitá djudiya portugeza aportó i estuvo en mas kantidad ke kualsiker otra sivdá Turka.
Alora, kualo son los chapines? Ken los kalsavan? I ken eran los Chapineros («Chapineiros» en portugéz)?
Bueno… ampesando de la demanda dalkavo, no tenemos munchas piskizas sovre este sujeto en la Península Ibérika, afilú están en munchas ovras, raramente los chapines son nombrados o se topan en arshivos viejos. Por eshemplo, nunka toparon dokumentos ke nombran los chapines o kualsiker otro modo de kalsados en la dota de boda de Dona Beatriz (1504-1538), la sigunda ija del rey Dom Manuel i de la reyna Dona Maria. Ama, savemos ke la reyna Katarina de Aragón yevó un par de chapines para la Inglaterra, komo sinyo de Autoridad, Elegansya, Sharmansya i Nobleza. El dokumento el mas viejo ke se tiene haber verso este sujeto es datado de 22 de Septiembre del 1489, i ayi se topan los Sapateiros, ansina komo los Borzeguineiros (ke aziyan chizmes ke ivan asta los dizes de la pachá) i los Chapineiros.
Los Chapines eran kalsados kon munchos boyos de altura, i las mujeres ke los kalsavan, teniyan menester de ayudo para menearsen i/o kaminar. Los mijores Chapineiros, se topavan en Lisboa, la kapitala de Portugal.
Los chapines ayegaron afilú en la Italia. En Venesia, teniyan un bayle de chapines, ke hue mijor elaborado por Fabrizio Caroso, kompozitor i mestre de bayle, nasido en el Lazio. En su tratado: Nobilitá di Dame (1600), nombró todo un kapitolo dedikado al bayle de Chapines, ande ambezava a las mujeres el mijor modo de baylar kon estos kalsados kodjam.
En la Iberia, los chapines eran kalsados solo por los de kaza alta: reynas, aristokratas, infantas i kon el pasar del tyempo, por las mujeres de klasa mas prove. Se puediya identifikar la klasa de la Dama kalsada en Chapines por los materiales ke yevavan sus Chapines i tambyén por el Boy de los chapines. Kuanto mas altos, mas alta era la nobleza de la Dama.
En Italya, los Chapines eran kalsados tambyén por las Kortezinas, ke eran las Namoradas de los reyes, Dukes i Markezes de la Italya. En el tyempo de Belle Époque, en Paris i en Venesia, las Kortezinas eran las putanas de lukso, i solo los mas rikos i «givires» puediyan echarsen kon eyas.
Toda esta piskiza ke ize me dio muncho plazer, porke, a la fin pude entender ke mizmo kuando avlamos tanto ke semos de orijin Espanyola, mos olvidamos ke tambyén semos parte Portugezes, Katalanes, Aragonezes i Leonezes i mas i mas… i ke el Gayego-Portugéz está alyentro muestra língua i en muestra sangre/erensya.
Aspero ke estas linyas vos topen sanos i rézyos i ke puedan ayudarvos a entender mijor ke mozos, Izmirlis (mizmo los de la Diáspora turkina) tenemos en los Chapines, una piska del Portugéz kon mozos, i ke no es yerrado.
Kon amistá,
Ítalo Felizardo.
