SOMALILAND SUPORTADO POR ISRAEL por el Dr. Selim Salti

Israel en pasadas tomo una desizyon istorika de rekonoser el Somaliland komo payiz independiente. Esto fue un evenimiento bastante importante de punto de vista stratejiko i no de un pakto diplomatiko en la politika de Israel afin de estableser en el futuro un muevo akordo Avraam kon este payiz muzulmano de la Afrika. Israel es visto en la shena internasyonala komo el primer payiz ke rekonosyo el Somaliland komo payiz independiente malgrado ke el egziste dezde 30 anyos sin ser achetado por una grande parte de la famiya de las nasyones.

El Somaliland se topa en el kuerno de la Afrika la kuala fue en 1884 kolonizada por los inglezes afin de pueder kontrolar el Estrecho stratejiko de Bab-el-Mandeb en el golfo de Aden. En el Junio 1960 el Somaliland obtuvo su independensya ke despues un kurto tiempo se adjunto kon la Somalia del sud italiana para formar la Republika Somaliana. Malorozamente esta unyon no fue de tura visto las tensiones internas del dezikilibro politiko i de la marjinalizasyon del Norte.

En los anyos 1980 debasho del rejimen diktatorial de Siad Barre uvo un jenosidio grande en el Norte el kual fue luchado por el Movimiento nasyonal somaliano (SNM) ke duro anyos. En Enero 1991 despues de la kayida de Barre el Somaliland proklamo su independensya en el 18 Mayo del mizmo anyo. Ansi en adornando las viejas fronteras de la vieja koloniya britanika el payiz se eskabuyo de los konfliktos internos en dezvelopando progresivamente sus institusyones stables, una administrasyon fonksyonal ke permetyo una pas relativa. El resto de la Somalia mizmo oy en diya es kaotiko i dirijado por diktatores. El Somaliland kon mas de 6 milyones de habitantes, dispoza oy de un governo, de una moneda, de una armada i organiza sus eleksyones liberamente i demokratikamente, su kapitala siendo Hargeisa.

La Somaliland se topa en un lugar importante del pasaje marítimo del komersyo internasyonal i ansi su valor stratejika es muy grande. El golfo de Aden koridor sovre el kual pasan las naves de komersyo i de enerjiya es un pasaje vurnelable visto ke el 12 % del komersyo del Este tranzita por este estrecho. Los Hutis prezentes en el golfo munchas vezes menasan de empidir el trafiko a traverso de eya i ansi krear un kaos ekonomiko en el mundo. Para empidir tal akto una prezensya de las fuersas militares oksidentales en Somaliland será neseserya i mizmo si Israel i si el Ayifto kereran guadrar el trafiko del porto de Elat i del Kanal de Suez en la Mar Korolada devran pensar a organizarse en konsekuensa.

Israel rekonose esta realita, la kuala devra ser rekonosida a su torno por los Estados Unidos. El Governo israeliano devra a este sujeto angajar una diplomasiya intensiva para konvenser las otoridades de Washington a rekonoser el estado de Somaliland. Mizmo el lobi djudyo a este sujeto puede ayudar a konvenser el prezidente Trump. Ademas Israel devra influensar la Evropa Unida i el Governo Inglez para el rekonosimiento de djura de la Somaliland. En esta parte de la Afrika topar un payiz pro- oksidental tal ke la Somaliland es muy raro, porke eya reprezenta una kombinasyon de tres faktores importantes, stabilita interna en una rejyon instavle, administrasyon i institusyones ke fonksyonan i su pozisyon stratejika muy importante.

Si Yerushalayim kere provar ke su akto de rekonosimiento es un akto djusto el Governo devra ovrar para ke otros payizes oksidentales rekonoskan a sus tornos estos somalianos muzulmanos liberales i demokratikos. No olvidar ke el kambyo de ambasadores fue echo poko tiempo antes i el Governo somaliano desidio de estableser su ambasada en Yerushalayim. Koza ke por la primera vez akontese en la istorya de Israel, ke un payiz muzulmano estableska su reprezentasyon en Yerushalayim, su kapitala.

En despartes de esto, entre Israel i la Turkiya ay una kompetisyon de tener un pye en el Kuerno de la Afrika. Los turkos kon la Somalia del sud, los israelianos kon la Somaliland, 2 payizes konsiderados sin atadijos. Los turkos miran por petrol en la mar de la Somalia, los israelianos de dezvelopar sus investimientos en el komerso a traverso el mas importante porto de la rejyon Berbera, el kual esta dezvelopandose de dia en dia kon investimientos ajenos.

Komo Israel nesesita porto seguro en la mar Kolorada tiene un atadijo a este porto el kual lo proteja de ser en una pozisyon kritika en el komerso de transito. El revenido de este porto ke depasa la miliarda de dólares al anyo es uno de los prinsipales benefisyos del payiz. Ademas Israel grasias a sus buenas relasyones kon la Ethiopia deve de mirar a ke el memorándum sinyado entre eya i la Somaliland se dezvelope de manera a ke ayga rekonosensya diplomatika entre los 2 payizes vizinos. La Ethiopia sin Berbera se topa asolada en su komersyo marítimo.

Esta rekonosensya ayudara a ke Israel kon sus diferentes teknolojiyas da apoyo prinsipalmente a la agrikultura del Somaliland el kual sufre de mankura de agua kronika. En konkluzyon diremos ke Israel se topa enfrente de un dilema ke es importante de okuparse i de dezveloparlo.

Dr. Selim Salti