Sefer Tora en Djudeo Espanyol – Transkrivida kon letras latinas del livro por Ye’huda Sidi / MELAHIM ALEF (1-5)

Ver todos los capítulos publicados en esta sección

 

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

MELAHIM ALEF

1         ¹I el rey David era vyejo, entrado en dias; i lo kuvrian kon panyos ma no se kayentava. ²I lo disheron sus syervos: bushken para mi senyor el ray una eskosa, i este delante del rey, i lo abrige, i yazga en tu seno, i se kayente a mi senyor el rey. ³I bushkaron una mosa ermoza por todo el termino de Yisrael; i toparon a Avishag la Shunamita, i la trusheron al rey. ⁴I la mosa era muy ermoza, i abrigava al rey, i le servia; ma el rey no la konosyo.

⁵I Adoniya, ijo de Hagit, se enshalsho, dizyendo: yo enreynare. I izo para si kuatriguas i kavayeros, i sinkuenta varones ke korryeran delante de el. ⁶I su padre nunka lo atristo en sus dias kon dizir: ¿por ke azes ansi? I tambyen el era muy ermozo de forma; i su madre lo paryo despues ke Maaha paryo a Avshalom. ⁷I tuvo sus konsejos kon Yoav, ijo de Tseruya, i kon Evyatar el saserdote; i eyos ayudaron de parte de Adoniya. ⁸Ma Tsadok el saserdote, i Benaya’hu, ijo de Ye’hoyada, i Natan el profeta, i Shimi, i Rei, i los barraganes ke tenia David, no eran kon Adoniya’hu. ⁹I Adoniya’hu degoyo ovejas, i vakas, i engordados, djunto a la pyedra de Zohelet, ke esta serka de fuente del Rogel; i konbido a todos sus ermanos, ijos del rey, i a todos los varones de Ye’huda, syervos del rey. ¹⁰Ma a Natan el profeta, i a Benaya’hu, i a los barraganes, i a Shelomo su ermano no konbido.

¹¹I avlo Natan a Bat-Sheva, madre de Shelomo, dizyendo: ¿no oiste ke enreyna Adoniya’hu, ijo de Hagit, i nuestro senyor David no lo save? ¹²I agora ven, te dare agora konsejo, i salva tu vida, i la vida de tu ijo Shelomo. ¹³Va i entra al rey David i dile: mi senyor rey, ¿no djuraste tu a tu syerva, dizyendo: syerto Shelomo tu ijo enreynara despues de mi, i el se asentara sovre mi siya? ¿por ke pues enreyna Adoniya’hu? ¹⁴Ek, myentras ke tu estas avlando ayi kon el rey, yo entrare detras de ti, i akavare tus palavras.

¹⁵I entro Bat-Sheva al rey a la kamara. I el rey era muy vyejo, i Avishag la Shunamita servia al rey. ¹⁶I Bat-Sheva se umilyo, i se enkorvo al rey. ¹⁷I el rey disho: ¿ke tyenes? i eya le disho: mi senyor, tu djuraste por A’ tu Dyo a tu syerva, dizyendo: syerto Shelomo tu ijo enreynara despues de mi, i el se asentara sovre mi siya. ¹⁸I agora, ek, Adoniya enreyna; i agora, mi senyor rey , no lo supiste. ¹⁹I degoyo bueyes, i engordados, i muy muchas ovejas, i konbido a todos los ijos del rey, i a Evyatar, el saserdote, i a Yoav, mayoral del fonsado; ma a Shelomo tu syervo no konbido. ²⁰I tu, mi senyor rey, los ojos de todo Yisrael estan sovre ti, para ke les des a saver kyen se a de asentar sovre la siya de mi senyor despues de el. ²¹I sera, kuando mi senyor el rey yazyere kon sus padres, yo i mi ijo Shelomo seremos kontados por pekadores.

²²I ek, myentres ke eya estava avlando kon el rey, Natan el profeta vino. ²³I avizaron al rey, dizyendo: ek Natan el profeta. I entro delante del rey, i se enkorvo al rey kon sus fases a tyerra. ²⁴I disho Natan: mi senyor rey, ¿dishiste tu: Adoniya’hu enreynara despues de mi, i el se asentara sovre mi siya? ²⁵Porke oy desendyo , i degoyo bueyes, i engordados, i muy muchas ovejas, i konbido a todos los ijos del rey, i a los mayorales del fonsado, i a Evyatar el saserdote; i ek, estan komyendo i bevyendo delante de el, i dizen: biva el rey Adoniya’hu. ²⁶Ma a mi mizmo, tu syervo, i a Tsadok el saserdote, i a Benaya’hu, ijo de Ye’hoyada, i a Shelomo tu syervo, no konbido. ²⁷¿Fue esta koza echa de mi senyor el rey, i no iziste saver a tu syervo kyen se avia de asentar sovre la siya de mi senyor el rey despues de el?

²⁸I respondyo el rey David, i disho: yamadme a Bat-Sheva. I eya vino delante del rey, i se paro delante del rey. ²⁹I el rey djuro, i disho: bivo A’ ke regmyo mi alma de toda angustya, ³⁰ke komo yo te djuri por A’ Dyo de Yisrael, dizyendo: syerto Shelomo tu ijo enreynara despues de mi, i el se asentara sovre mi siya en mi lugar, ke ansi lo are en este dia. ³¹I Bat-Sheva se umilyo kon sus fases a tyerra, i se enkorvo al rey, i disho: biva mi senyor el rey David para syempre.

³²I disho el rey David: yamadme a Tsadok el saserdote, i a Natan el profeta, i a Benaya’hu, ijo de Ye’hoyada. I eyos vinyeron delante del rey. ³³I el rey les disho: tomad kon vozotros los syervos de vuestro senyor, i azed kavayar a Shelomo mi ijo sovre mi propya mula, i azeldo desender a Gihon. ³⁴I Tsadok el saserdote i Natan el profeta lo untaran ayi por rey sovre Yisrael; i tanyeresh kon la trompeta, i diresh: biva el rey Shelomo. ³⁵I suviresh detras de el, i vendra, i se asentara sovre mi siya, i el reynara en mi lugar; i a el ordeni ke sea prinsipe sovre Yisrael i sovre Ye’huda. ³⁶I Benaya’hu, ijo de Ye’hoyada, respondyo al rey, i disho: amen. Ansi diga A’ Dyo de mi senyor el rey. ³⁷Komo A’ fue kon mi senyor el rey, ansi sea kon Shelomo, i engrandeska su siya mas ke la siya de mi senyor el rey David.

³⁸I desendyo Tsadok el saserdote, i Natan el profeta, i Benaya’hu, ijo de Ye’hoyada, i los Kertios, i los Peltios, i izyeron kavayar a Shelomo sovre la mula del rey David, i lo yevaron a Gihon. ³⁹I Tsadok el saserdote tomo el kuerno del azeyte de la tyenda, i unto a Shelomo. I tanyeron kon la trompeta, i disheron todo el puevlo: biva el rey Shelomo. ⁴⁰I suvyeron todo el puevlo detras de el, i el puevlo tanyian kon flautas, i se alegravan kon alegria grande, de modo ke paresia le la tyerra se avria kon el sonido de eyos.

⁴¹I lo oyo Adiniya’hu. i todos los konbidados ke estavan kon el, kuando avia akavado de komer. I oyo Yoav, el sonido de la trompeta , i disho: ¿por ke es este ruido de la sivdad, ke esta en rebuelta? ⁴²Myenytras ke el avlava, ek, Yonatan, ijo de Evyatar el saserdote, vino. I disho Adoniya’hu: entra, porke tu eres varon vayente, i traes buenas nuevas. ⁴³I respondyo Yonatan, i disho a Adoniya’hu: por syerto nuestro senyor el rey David izo enreynar a Shelomo. ⁴⁴I el rey enbio kon el a Tsadok el saserdote, i a Natan el profeta, i a Benaya’hi, ijo de Ye’hoyada, i a los Kertios, i a los Peltios; i lo izyeron kavayar sovre la mula del rey. ⁴⁵I Tsadok el saserdote i Natan el profeta lo untaron por rey en Gihon; i de ayi suvyeron alegres, i la sivdad esta en rebuelta. Este es el ruido ke oistesh. ⁴⁶I tambyen Shelomo ya esta sentado sovre la siya del reyno. ⁴⁷I tambyen los syervos del rey vinyeron a bendizir a nuestro senyor el rey David, dizyendo: el Dyo aga bueno el nombre de Shelomo mas ke tu nombre, i aga su siya mas grande ke tu siya. I el rey se enkorvo sovre la kama. ⁴⁸I tambyen ansi disho el rey: bendicho sea A’ Dyo de Yisrael, ke a dado oy kyen se asente sovre mi siya, vyendolo mis ojos.

⁴⁹I se estremesyeron i se levantaron todos los konbidados ke estavan kon Adinoya’hu, i se fueron kada uno a su kamino. ⁵⁰I Adoniya’hu temyo por kavza de Shelomo, i se levanto, i se fue, i travo de los kuernos del ara. ⁵¹I fue dado avizo a Shelomo, dizyendo: ek, Adoniya’hu tyene myedo del rey Shelomo, i ek, travo de los kurnos del ara, dizyendo: djurame oy el rey Shelomo, ke no matara a su syervo kon la espada. ⁵²I disho Shelomo: si el fuere ombre virtuozo, ni uno de sus kaveyos kaera a tyerra; ma si se topare maldad en el, murira. ⁵³I enbio el rey Shelomo, i lo izyeron desender del ara. I el vino, i se enkorvo al rey Shelomo. I Shelomo le disho: vate a tu kaza.

2         ¹I se aserkaron los dias de David para murir; i enkomendo a Shelomo su ijo, dizyendo: ²yo voy por el kamino de toda la tyerra; esfuersate pues, i komportate komo varon. ³I guarda la guardya de A’ tu Dyo, andando en sus kaminos, guardando sus fueros, sus enkomendansas, i sus djuisyos, i sus testimonyos, komo esta eskrito en la Ley de Moshe, para ke seas dichozo en todo lo ke izyeres, i en todo akeyo a ke te tornares: ⁴para ke afirme A’ su palavra ke avlo tokante a mi, dizyendo: si tus ijos guardaren su kamino, andando delante de mi kon verdad, kon todo su korason i kon toda su alma, disho el, nunka faltara a ti varon sovre la siya de Yisrael. ⁵I tambyen tu saves lo ke me izo Yoav, ijo de Tseruya, lo ke izo a dos mayorales de los fonsados de Yisrael, a Avner, ijo de Ner, i a Amasa, ijo de Yeter, a los kuales mato, i vertyo en paz la sangre de gerra, i metyo la sangre de gerra en su senyidero ke tenia sovre sus lumbos, i en sus sapatos ke tenia en sus pyes. ⁶Aras pues segun tu saviduria, i no desharas desender su kaneza en paz a la fuesa. ⁷Ma a los ijos de Barzilay el Giladita aras mersed, i seran entre los ke komen a tu meza; porke ansi se ayegaron a mi kuando yo fuia delante de Avshalom tu ermano. ⁸I ek, kontigo esta Shimi , ijo de Gera, varon de Binyamin, de Bahurim. el kual me maldisho kon maldisyon fuerte en el dia ke yo iva a Mahanayim; ma el desendyo a resivirme al Yarden, i yo le djuri por A’, dizyendo: no te matare kon la espada. ⁹Ma agora no lo livres; porke varon savyo eres, i saves lo ke tyenes ke azerlo; i aras desender su kaneza kon sangre a la fuesa.

¹⁰I yazyo David kon sus padres, i fue enterrado en la sivdad de David. ¹¹I los dias ke enreyno David sovre Yisrael fueron kuarenta anyos; en Hevron enreyno syete anyos, i en Yerushalayim enreyno trenta i tres anyos. ¹²I Shelomo asento sovre la siya de David su padre, i fue konfirmado su reyno mucho.

¹³I Adoniya’hu, ijo de Hagit, vino a Bat-Sheva, madre de Shlomo. I eya disho: venida es de paz? I el disho: si, de paz. ¹⁴I el disho: una palavra tengo ke dizirte. I eya disho: avla. ¹⁵I el disho: tu saves ke el reyno era mio, i ke todo Yisrael puzyeron sovre mi sus fases, para ke yo enreynara; ma el reyno fue buelto, i fue pasado a mi ermano; porke de parte de A’ era suyo. ¹⁶I agora te demando una demanda, no me agas tornar mis fases. I eya le disho: avla. ¹⁷I el disho: te rogo ke digas al rey Shelomo, (porke el no te ara tornar tus fases,) ke me de a Avishag la Shunamita por mujer. ¹⁸I disho Bat-Sheva: byen yo avlare por ti al rey. ¹⁹I vino Bat-Sheva al rey Shelomo para avlar por Adoniya’hu. I el rey se levanto a resivirla, i se enkorvo a eya, i se asento sovre su suya; i izo meter una siya para la madre del rey, i eya se asento a su derecha. ²⁰I eya disho: una chika demanda te demando; no me agas tornar mis fases. I el rey le disho: demanda madre mia; porke no te are tornar tus fases. ²¹I eya disho: sea dada Avishag la Shunamita por mujer a Adoniya’hu tu ermano. ²²I respondyo el rey Shelomo, i disho a su madre: ¿i por ke demandas a Avishag la Shunamita para Adoniya’hu? Demanda tambyen para el el reyno; porke el es mi ermano mayor; para el, i para Evyatar el saserdote; i para Yoav, ijo de Tseruya. ²³I el rey Shelomo djuro por A’, dizyendo: me aga el Dyo , i ansi anyada, ke kontra su propya vida avlo Adoniya’hu esta palavra. ²⁴I agora, bivo A’, ke me konfirmo, i me izo asentar sovre la siya de David mi padre, i ke me izo kaza komo avlo, ke oy sera matado Adoniya’hu. ²⁵I enbyo el rey Shelomo por mano de Benaya’hu, ijo de Ye’hoyada el kual se echo sovre el, i muryo.

²⁶I a Evyatar el saserdote disho el rey: vate a Anatot a tu kampo, porke mereses muerte; ma yo no te matare este dia, porke levantaste el arka del Senyor A’ delante de David mi padre, i porke tu fuiste afriido en todo akeyo en ke fue afriido mi padre. ²⁷I echo Shelomo a Evyatar de ser saserdote a A’, para kumplir la palavra de A’ ke el avlo sovre la kaza de Eli en Shilo.

²⁸I vino la notisya asta Yoav; porke Yoav se avia akostado detras de Adoniya’hu, aunke no se avia akostado detras de Avshalom. I fuyo Yoav a la tyenda de A’, i travo de los kuernos del ara. ²⁹I fue dado avizo al rey Shelomo ke Yoav avia fuido a la tyenda de A’, i ek, ke estava djunto al ara. I enbyo Shelomo a Benaya’hu, ijo de Ye’hoyada, dizyendo: va, echate sovre el. ³⁰I vino Benaya’hu a la tyenda de A’, i le disho: ansi dize el rey: sal. I el disho: no, sino aki murire. I Benaya’hu torno respuesta al rey, dizyendo: ansi avlo Yoav, i ansi me repondyo. ³¹I el rey le disho: az komo el avlo, i echate sovre el, i entyerralo; i kita de sovre mi, i de sovre la kaza de mi padre, la sangre ke Yoav vertyo sin kavza. ³²I A’ aga tornar su sangre sovre su kavesa, ke se echo sovre dos varones mas djustos i mejores ke el, i los mato kon la espada, sin ke David mi padre lo supyera, a Avner, ijo de Ner, mayoral del fonsado de Yisrael, i a Amasa, ijo de Yeter, mayoral del fonsado de Ye’huda. ³³I tornese la sangre de eyos sovre la kavesa de Yoav, i sovre la kavesa de su semen para syempre; ma a David, i a su semen, i a su kaza, i a su siya, ayga paz para syempre de parte de A’. ³⁴I suvyo Benaya’hu, ijo de Ye’hoyada, i se echo sovre el, i lo mato, i fue enterrado en su kaza en el dizyerto. ³⁵I el rey metyo a Benaya’hu, ijo de Ye’hoyada, en su lugar sovre el fonsado; i a Tsadok el saserdote metyo el rey en lugar de Evyatar.

³⁶I enbio el rey, i yamo a Shimi i le disho: fraguate una kaza en Yerushalayim, i mora ayi; i no salgas de ayi a una parte ni a otra. ³⁷Porke sera, ke en el dia ke salyeres i pasares el arroyo de Kidron, sepas por syerto ke murir muriras; tu sangre sera sovre tu kavesa. ³⁸I disho Shimi al rey: buena es la palavra; komo avlo mi senyor el rey, ansi ara tu syervo. I moro Shimi en Yerushalayim muchos dias.

³⁹I al kavo de tres anyos akontesyo, ke dos syervos de Shimi se fuyeron a Ahish, ijo de Maaha, rey de Gat. I dyeron avizo a Shimi, dizyendo: ek, tus syervos estan en Gat. ⁴⁰I Shimi se lavanto, i sincho su azno, i fue a Gat a Ahish abushkar sus syervos; i fue Shimi, i trusho sus syervos de Gat.

⁴¹I fue dado avizo a Shelomo ke Shimi se avia ido de Yerushalayim a Gat, i ke avia tornado. ⁴²I el rey enbyo, i yamo a Shimi, i le disho: ¿no te kondjuri yo por A’, i te akavidi. dizyendo: en el dia ke salyeres i fueres, por aki i por ayi, sepas por syerto ke murir muriras? I me dishiste: buena es la palavra, ovedesko. ⁴³¿Por ke pues no guardaste la djura de A’. i la enkomendansa ke te enkomendi? ⁴⁴I disho mas el rey a Shimi: tu saves todo el mal ke tu korason save, ke iziste a David mi padre; ma A’ torno tu mal sovre tu kavesa. ⁴⁵I el rey Shelomo sera bendicho: i la siya de David sera firme delante de A’ para syempre. ⁴⁶I el rey enkomendo a Benaya’hu, ijo de Ye’hoyada, el kual salyo, i se echo sovre el, i muryo. I el reyno fue konfirmado en mano de Shelomo.

3         ¹I Shelomo konsogro kon Paro, rey de Ayifto; i tomo por mujer la ija de Paro, i la trusho a la sivdad de David, asta ka akavo de fraguar su kaza, i la kaza de A’, i la muraya de Yerushalayim al derredor. ²Solamente el puevlo sakrifikavan en los altares; porke no avia kaza fraguada al nombre de A’ asta akeyos dias. ³I Shelomo amo a A’, andando en los fueros de David su padre; solamente sakrifikava i saumava en los altares. ⁴I anduvo el rey a Givon para sakrifikar ayi; porke akel era el altar grande. Mil alsasyones also Shelomo sovre akeya ara.

⁵En Givon se aparesyo A’ a Shelomo en suenyo de la noche, i disho el Dyo: demanda lo ke kyeres ke te de. ⁶I disho Shelomo: tu iziste gran mersed kon tu syervo David mi padre, komo el anduvo delante de ti kon verdad, i kon djustedad, i kon derechedad de korason kontigo; i le guardaste esta grande mersed, ke le diste un ijo ke se asentara sovre su siya, komo es en este dia. ⁷I agora, A’ mi Dyo, tu iziste enreynar a tu syervo en lugar de David mi padre; i yo soy moso pekenyo, ke no se salir ni entrar. ⁸I tu syervo esta en medyo de tu puevlo ke eskojiste, un puevlo grande, ke no se puede kontar ni numerar por muchedumbre. ⁹Da pues a tu syervo korason entendido para djuzgar a tu puevlo, para entender entre lo bueno i lo malo; porke ¿kyen podra djuzgar a este tu puevlo tan grande? ¹⁰I la palavra plazyo en ojos de Adonay, ke Shelomo demando esta koza. ¹¹I el Dyo le disho: por lo ke demandaste esta koza i no demandaste para ti muchos dias, ni demandaste para ti rikeza, ni demandaste la vida de tus enemigos, ma demandaste para ti entendimyento para oir djuisyo: ¹²ek, yo ize segun tu palavra; ek, yo te di korason savyo i entendido, tal ke ni antes de ti uvo otro komo tu, ni despues de ti se levantara otro komo tu. ¹³I tambyen te di lo ke no demandaste, tanto rikeza komo onra, tal ke entre los reyes no avra ninguno komo tu en todos tus dias. ¹⁴I si anduvyeres en mis kaminos, guardando mis fueros i mis enkomendansas komo anduvo tu padre, yo alargare tus dias.

¹⁵I Shelomo se desperto, i ek, era suenyo. I vino a Yerushalayim, i se paro delante del arka del firmamyento de A’, i also alsasyones, i izo sakrifisyos de pases, i izo konbite a todos sus syervos..

¹⁶I vinyeron dos mujeres eskaradas al rey, i se pararon delante de el. ¹⁷I disho la una mujer: rogo, mi senyor, yo i esta mujer moramos en una mizma kaza, i yo pari kon eya en kaza. ¹⁸I akontesyo, ke al terser dia despues ke yo pari, paryo tambyen esta mujer; i estavamos djuntas; no avia estranyo kon nozotros en la kaza, solamente nozotras dos en la kaza. ¹⁹I el ijo de esta mujer muryo de noche; porke eya yazyo sovre el. ²⁰I eya se levanto a medya noche, i tomo mi ijo de mi lado, kuando yo tu syerva durmia, i lo puzo en su seno, i puzo en mi seno su ijo muerte. ²¹I kuando yo me levanti por la manyana para alechar a mi ijo, ek, estava muerto. I yo lo miri por la manyana, i ek, no era mi ijo ke pari. ²²I la otra mujer disho: no, sino ke mi ijo es el bivo, i tu ijo es el muerto. I akeya dizia: no sino ke tu ijo es el muerto, i mi ijo es el bivo. I de esto modo avlavan delante del rey. ²³Entonses disho el rey: esta dize ke este ke esta bivo es mi ijo, i tu ijo es el muerto; i la otra dize: no, sino ke tu ijo es el muerto, i mi ijo es el bivo. ²⁴I disho el rey: traedme una espada. I trusheron una espada delante del rey. ²⁵I disho el rey: partid el ninyo bivo en dos, i dad la mitad a la una, i la mitad a la otra. ²⁶Entonses la mujer de kyen era el ijo bivo, disho al rey: (porke sus entranyas se eskayentaron por su ijo,) i disho: rogo, mi senyor, dad a esta el ninyo bivo, i matar no lo matesh. I la otra disho: no sea ni mio ni tuyo, partildo. ²⁷Entonses el rey respondyo i disho: dad a esta el ninyo bivo, i matar no lo matesh; eya es su madre. ²⁸I todo Yisrael oyeron el djuisyo ke djuzgo el rey, i temyeron al rey; porke vyeron ke avia en el savudiria del Dyo para djuzgar.

4         ¹I el rey Shelomo fue rey sovre todo Yisrael. ²I estos fueron los mayorales ke tenia: Azarya’hu, ijo de Tsadok el saserdote; ³Elihoref i Ahiya, ijos de Shisha, eskrivanos; Ye’hoshafat ijo de Ahilud, el kronista; ⁴i Benaya’hu ijo de Ye’hoyada, sovre el fonsado; i Tsadok i Evyatar, saserdotes; ⁵i Azarya’hu, ijo de Natan, sovre los rejidores; i Zavud, ijo de Natan, ministro, kompanyero del rey; ⁶i Ahishar tenia mando de la kaza; i Adoniram, ijo de Avda, sovre la pecha.

⁷I tenia Shelomo dodje rejidores sovre todo Yisrael, los kuales mantenian al rey i a su kaza; kada uno tenia ke mantener un mez en el anyo. ⁸I estos son sus nombres: Ben-Hur, en el monte de Efrayim: ⁹Ben-Deker, en Makats i en Shaalvim, i en Bet-Shemesh, i en Elon de Bet-Hanan: ¹⁰Ben-Hesed en Arubot; el tenia a Soho, i toda la tyerra de Hefer: ¹¹Ben-Avinadav en toda la komarka de Dor; el tenia por mujer a Tafat, ija de Shelomo: ¹²Baana ijo de Ahilud en Taanah i Megido i todo Bet-Shean, ke esta serka de Tsarten, debasho de Yizreel dezde Bet-Shean asta Avel-Mehola, asta la otra parte de Yokmeam: ¹³Ben-Gever en Ramot-Gilad; el tenia las aldeas de Yair, ijo de Menashe, ke estava en Gilad; tenia tambyen la komaraka de Argov, ke es en Bashan, sesenta sivdades grandes kon murayas i serraduras de alambre: ¹⁴Ahinadav, ijo de Ido, en Mahanayim: ¹⁵Ahimaats en Naftali; el tomo tambyen por mujer a Basemat, ija de Shelomo: ¹⁶Baana ijo de Hushay, en Asher i en Alot: ¹⁷Ye’hoshafat, ijo de Paruah en Yissahar: ¹⁸Shimi, ijo de Ela, en Binyamin: ¹⁹Gever, ijo de Uri, en la tyerra de Gilad, la tyerra de Sihon, rey de los Emorios, i de Og, rey de Bashan; i era el solo rejidor ke estava en la tyerra. ²⁰Ye’huda i Yisrael eran muchos komo la arena ke esta sovre la oriya de la mar en muchedumbre, komyendo i bevyendo, i alegrandose.

5         ¹I Shelomo podestava en todos los reynos dezde el rio asta la tyerra de los Pelishtios, i asta el termino de Ayifto: pagavan pecha, i servian a Shelomo todos los dias de su vida.

²I el mantenimyento de Shelomo por kada dia era trenta koros de semola, i sesenta koros de arina: ³I dyez bueyes gordos, i vente bueyes de pasto, i syen ovejas, afuera de syervos, i korsos, i gamos, i kapones engordados. ⁴Porke el podestava en todo el paiz de esta parte del rio, dezde Tifsah asta Aza, sovre todos los reyes de esta parte del rio. I tenia paz por todas sus partes al derredor. ⁵I Ye’huda i Yisrael moravan seguros, kada uno debasho de su vid i debasho de su igera, dezde Dan asta Beer-Sheva, todos los dias de Shelomo.

⁶I Shelomo tenia kuarenta mil pezevres de kavayos para sus kuatriguas, i dodje mil kavayeros. ⁷I akeyos rejidores mantenian al rey Shelomo, i a todos los ke venian a la meza del rey Shelomo, kada uno su mez; no deshavan faltar koza. ⁸I traian la sevada i la paja para los kavayos i para los djentes al lugar onde estavan, kada uno segun su orden.

⁹I dyo el Dyo a Shelomo saviduria, i entendimyento muy mucho, i anchura de korason, komo la arena ke esta sovre la oriya de la mar. ¹⁰I la saviduria de Shelomo fue mucha mas ke la saviduria de toda la [1]djente del oryente, i ke toda la saviduria de los Aisyanos. ¹¹I era mas savyo ke todos los ombres, mas ke Etan el Ezrahita, i ‘Heman, i Halkol, i Darda, ijos de Mahol; i fue su fama en todas las nasyones al derredor. ¹²I avlo tres mil enshemplos, i sus kantares fueron mil i sinko. ¹³I avlo de los arvoles, dezde el alarze ke esta en el Levanon asta el oregano ke sale en la pared; i avlo sovre las kuatropeas, sovre las aves, i sovre las removilyas, i sovre los peshes. ¹⁴I venian de todos los puevlos para oir la saviduria de Shelomo, de todos los reyes de la tyerra ke avian oido de su saviduria.

¹⁵I Hiram, rey de Tsor, enbyo sus syervos a Shelomo; porke oyo ke lo avian untado por rey en lugar de su padre; porke Hiram avia sido amigo de David todos los dias.

¹⁶ I enbyo Shelomo a Hiram, dizyendo: ¹⁷tu saves komo David mi padre no pudo fraguar kaza al nombre de A’ su Dyo a kavza de las gerras kon ke sus enemigos lo rodearon, asta ke A’ los puzo debasho de las plantas de sus pyes. ¹⁸Ma agora A’ mi Dyo me a dado repozo al derredor, ke ni ay atorsidor ni mal enkuentro. ¹⁹I ek, yo penso de fraguar kaza al nombre de A’ mi Dyo, komo A’ avlo a David mi padre, dizyendo: tu ijo ke pondre en tu lugar sovre tu siya, el fraguara la kaza a mi nombre. ²⁰Agora pues enkomenda ke me korten alarzes del Levanon; i mis syervos estaran kon tus syervos; i te dare la paga de tus syervos, segun todo lo ke disheres; porke tu saves ke no ay entre nozotros ninguno ke sepa kortar maderos komo los Tsidonios.

²¹I fue, ke kuando Hiram oyo las palavras de Shelomo, se alegro mucho, i disho: bendicho sea oy A’, ke dyo a David un ijo savyo sovre este puevlo grande. ²²I enbyo Hiram a Shelomo, dizyendo: yo oi lo ke me enbiaste a dizir; yo are toda tu veluntad tokante a maderos de alarze i maderos de pino. ²³Mis syervos los abasharan del Levanon a la mar; i yo los pondre en balsas por la mar asta el lugar ke tu me senyalares, i los are deatar ayi, i tu los resiviras; i tu aras mi veluntad, dando pan a mi kaza. ²⁴I Hiram dava a Shelomo maderos de alarze, i maderos de pino, a toda su veluntad. ²⁵I Shelomo dava a Hiram vente mil koros de trigo por el mantenimyento de su kaza, i vente koros de azeyte limpyo. Esto dava Shelomo a Hiram kada anyo.

²⁶I A’ dyo saviduria a Shelomo, komo le avia avlado; i uvo paz entre Hiram i Shelomo, i tajaron firmamyento ambos eyos. ²⁷I tomo el rey Shelomo pecha de todo Yisrael, i la pecha fue trenta mil varones. ²⁸I los enbiava al Levanon, dyez mil en kada mez, por sus tornos; un mez estavan en el Leabon i dos mezes en su kaza; i Adoniram estava sovre la pecha. ²⁹I Shelomo tenia setenta mil ke yevavan karga, i ochenta mil kortadores en el monte: ³⁰afuera de los mayorales prinsipales de Shelomo ke estavan sovre la ovra, tres mil i tressyentos, los kuales podestavan sovre el puevlo ke travajavan en lo ovra. ³¹I enkomendo el rey ke kortaran pyedras grandes, pyedras presyadas para asementar la kaza, pyedras lavradas. ³²I las alizaron los fraguadores de Shelomo, i los fraguadores de Hiram, i los Givlios; i aparejaron los maderos i las pyedras para fraguar la kaza.

[1] Ebreo: ijos

Ver todos los capítulos publicados en esta sección

 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.