SALVARON A 19 JUDIOS DEL YEMEN trezladado al ladino por Simon Geron

En el Jewish News del 23 de marso «Nathan Jeffay» tenia un artikulo sovre los ultimos Judios del Yemen ke fueron bolados a Israel. Fueron salvados de un pais ke tiene una Gerra Sivil i ande los massakros Anti Semites reklamaron a 2 vidas en la Ultima Dekada.

Un grupo de 17 yego a Israel la noche de Alhad en una mission sekreta i los analistos se demandan komo lo izieron. Yemen esta blokeado por la Arabia Saudita. La atmosfera es violenta i no se topan oy las Embassadas de Los Estados Unidos i de Inglaterra ayi. En el pasado se azian unos volos Israelianos kisas grasias a la situasion de antes. Estos Judios deshan atras a un pais volatile ande es peligroso ser Judio. Se kedavan ayi 40 o 50 personas formando la Ultima Aliya. Bivian en un lugar serrado de todo basho la proteksion de las autoridades del Yemen. Estos 17 kaien entre la edad de los mas chikos asta sus abuelos. 2 vinieron antes unos kuantos dias. Dentro unas oras se toparon sentados en la ofisina del Primer Ministro. Eyos le mostraron un pedazo de la Sefer Tora ke trusheron kon eyos i un chiko la meldo. Era un papel de 500 anios. Después el Primer Ministro le demando, komo se ambezo a meldar en ebreo. Su repuesta era ke su abuelo le avia enseniado.

«Natan Sharansky» Direktor de la «Agensia Judia»avia arreglado la Aliya kon el ayudo de las Autoridades Amerikanas. Un episodio final de la istoria ke empezo en 1949 kon la «Operasion Magic Carpet/Alfombra Magica». Era un dia alegre para estos Yemenitos ke agora se estavan ambezando el ebreo. Venian de una Kommunidad de 2000 anios. Pensavan ke no iva aver mas «Shehitah i Karne Kasher ayi». Pokas kriaturas se kedavan ayi mismo si avia una Edukasion Judia, faltava el Sistem. Era la fin de una Vida Judia organizada.»